كثيرا ما نسمع عن مشاكل وخلافات عائلية بين الفنانين، ولكن هذه المرة مع هنا الزاهد التي من المفترض أن تستعد للاحتفال بأول تجربة سينمائية لها مع روجها أحمد فهمي.
المرة دي خناقة هنا الزاهد كانت مع أخو جوزها الفنان كريم فهمي ومراته دانية البناوي، واللي بقوا مش طايقين بعض.. بس يا ترى إيه حقيقة اللي حصل؟ وهل ممكن يوصل الموضوع لانفصالها من جوزها؟.. خليكوا معايا في الفيديو ده هقولكم على الليلة واللي فيها.
هنا الزاهد اليومين دول مستنية تحتفل تبقى فرحتها فرحتين فرحة بعيد الأضحى زي كل الناس وفرحة خاصة بعرض فيلمها الجديد “مستر إكس” في العيد واللي بيتكلم عن قصة حب بين رئيس عصابة ومحامية الظروف هي اللي بتحبها في طريقه، وده هيخليه يضطر يبعدها عن أي خطر ممكن تتعرض ليه.. الفيلم ده هيكون بطولة أحمد فهمي، وهنا الزاهد، وأوس أوس، وبيومي فؤاد، ورحاب الجمل، ومحمود حافظ، وفيه ضيوف الشرف زي أكرم حسني، ومصطفى خاطر، ومحمد أنور، وصبرى فواز، وعمرو يوسف.. والمنافسة بيه هتكون شديدة أوي مع النجم تامر حسني اللي نازل بفيلم هو كمان.
أصل الحكاية
هنا الزاهد دخلت عيلة أحمد فهمي سنة 2019 لما قررت تتجوزه ومش فارق معاها فرق السن اللي بينهم واللي يعتبر كبير حبتين لكن ما علينا الحب يصنع المعجزات ويمكن شايفة فيه حاجة محدش شايفها والعكس المهم مش ده موضوعنا.. لكن اللي حصل من كام ساعة إن الجمهور بيقول في مشكلة حاصلة في العيلة عند أحمد فهمي والطرف في الموضوع ده مراته هنا الزاهد.. والدليل كان موجود مش أي هري هو .
هنا الزاهد حذفت أخو جوزها الفنان كري فهمي من على حسابها في إنستجرام ومش هو بس دي رزعت مراته دانيا البنهاوي كمان بلوك ومحدش فيهم موجود على حسابها..بس كده لأ وكمان كريم فهمي ومراته اتعاملوا بالمثل وراحوا رازعين هنا الزاهد هي كمان بلوك.
الموضوع كان واقف لحد هنا واخوات هنا الزاهد فرح ونور ملهمش دعوة بالحكاية وكانت دانية البنهاوي وكريم فهمي جوزها بيتابعوا الاتنين عادي في إنستجرام لحد ما فجأة لقينا الاتنين كمان مش موجودين عندهم وشكل الأزمة كبيرة وبقوا متضامنين مع أختهم هنا.. طيب هي إيه الحيرة دي يا جماعة المهم الناس ملهمش سيرة غير على الصورم اللي متصدر التريند الأيام دي وبيقولوا ده شغل سلايف اللي معروفين بالغيرة من بعض وعادي كله أصلا عادي.
هنا الزاهد فين؟
أحمد فهمي ومراته كويسين مع بعض والحمد لله لسه متابعين بعض والأزمة العائلية دي مطفحتش عليهم والأمور دخلت في بعض.. بس هنا الزاهد دلوقتي طلعت على السعودية وده اللي قالته على حسابها في الستوري على إنستجرام..
حقيقة الأزمة
الموضوع مخلصش لحد هنا وناس بتقول في فعلاً أزمة وهما مخبيين بسبب الفيلم وبسبب أن هنا طلعت وقالت في الفيلم أنها مش طايقة أخو جوزها كريم فهمي ومراته ولا أمه وده اللي خلاهم زعلوا منها.
ناس تانية بتقول لأ مفيش أزمة وكل ده مترتب عشان يعملوا دعاية قبل عرض الفيلم ومفيش أحسن من كده.. ووسط كل ده في مصدر مقرب من الأسرة بحسب تصريحات صحفية قال إن مفيش مشكلة ولا حاجة وكل ده أمور ملهاش أي أساس من الصحة وأفراد الأسرة بيتقابلوا عادي مع بعض والدنيا لطيفة.. بس الجمهور مش مصدق ومش معقول يعني يكون في أسرتين مشهورين زيهم كده ميكونوش بيتابعوا بعض على إنستجرام على الأقل لو في مشكلة فعلاً متكبرش بالبلوكات في مواقع التواصل وإلا لو مفيش مشكلة مكانتش فرح ونور يبقوا موجودين وبعدين يختفوا.
