الايام هذه مليئة حوارات كثيرة تخص الوسط الفني، مابين زواج وانفصال وخناقات واعتزال، لا نعرف من اول السنة وماذا يحدث للنجوم.
وانتشرت اشاعة جديدة خلال الكام ساعة عن انفصال الفنانة هنا الزاهد وجوزها احمد فهمي .. وده طبعا بعد الخناقة اللي حصلت بين هنا وسلفتها دانيا مرات كريم فهمي والموضوع كبر بين الاسرتين ،، ياترى ايه اللي حصل بقى ؟
طبعا الخبر مش صحيح ، ومحصلش اي انفصال بين هنا الزاهد وأحمد فهمي ، لكنها مجرد مشكلة عائلية مسيرها تتحل ، ومحدش من الطرفين علق ولا جاب سيرة انفصال خالص بعد الشر ربنا يسعدهم.
طب ايه قصة الخناقة اللي حصلت بين هنا ودانيا ؟فجأة لقينا هنا الزاهد الغت متابعة كريم فهمي اخو جوزها احمد فهمي ومراته دانيا البناوي، وهما كمان لغوا متابعتهم ليها على انستجرام ، وده معناه ان اكيد في حاجة حصلت خلتهم يعملوا كل ده.
لكن هنا مجتش جنب اكونت جوزها كريم ولسة عاملين متابعة لبعض لانهم اكتيف جدا على السوشيال ميديا وبيحبوا يهزروا مع بعض في التعليقات يعني لو انفصال حصل طبيعي كانت هتعمله بلوك مثلا لكنها معملتش كدا ، يعني مشكلتها مع سلفتها واخو جوزها.
وطبعا شغل الستات اشتلغ ، و هنا الزاهد بعد ما عملتلهم ان فولو ، كتبت ستوريهات عندها ع الانستجرام فيها كلمتين تلقيح، وقالت : افعل ماهو جيد لصحتك النفسية، وكمان نشرت هنا صورة ليها وكتبت عليها : اذهب حيث تشعر أنك على قيد الحياة”.
محدش عارف سبب الخناقة ايه ، ودانيا مرات كريم فهمي هي كمان الغت متابعة هنا من عندها ، مفيش ولا صورة ليها مع هنا على حسابها ، وكلها صورها هي وجوزها بس ، شكلهم كدا الستات وقعوا في بعض ، والرجالة مش عارفين يعملوا ايه
كل ده وفي صمت تام من الاربع اطراف محدش طلع اتكلم و قال ان في مشكلة ولا حوار وكلهم ساكتين يمكن مشكلة ستات وهتتحل عادي زي مابيحصل في اي عيلة.
ومن ساعة ما اتجوزت هنا الزاهد وأحمد فهمي وبنشوف صور كتير عائلية بتجمعهم مع اخوه كريم ومراته دانيا ، وكان واضح ان علاقتهم قوية وكويسة وحابين جو الاسرة مع بعض ، سفريات بقى وخروج وصور وفسح ، لحد ما حصل تاتش بين هنا ودانيا ، وعلى مايبدو هي خناقة ستات بس لان كريم واحمد ساكتين ومعملوش اي رد فعل.
طب ايه بقى موضوع الانفصال ده ؟
انفصال هنا الزاهد واحمد فهمي دي اشاعة طلعت بعد ما اتعرف ان هنا لغت متابعة اخو جوزها ومراته ، وتم تداول سكرين شوت للفلورز بتوع هنا ومكنش فيهم كريم فهمي ودانيا ، فالناس اعتقدت ان في مشكلة بين هنا وفهمي وطلعت اشاعة الانفصال.
لكن دي مجرد اشاعة ، بالعكس دول عاملين فيلم جديد مع بعض اسمه مستر اكس ، هيتعرض في عيد الاضحى ان شاءالله ، وهما الاتنين بيروجوا للفيلم على حساباتهم ، والناس حابة تشوف الثنائي دول مع بعض في عمل جديد ، خاصة وان هنا وأحمد فهمي من الكابلز اللي الناس بتحبهم في الوسط الفني وبيعملوا حالة حلوة على السوشيال ميديا ومتابعينهم زادوا بعد جوازهم.
هنا الزاهد واحمد فهمي عملوا فرح كبير في 2019 وحضره نجوم كتير وهنا لبست فستانين وفرحها وصورها فضلت تريند لفترة طويلة لان كل الناس اتفاجئت بجوازهم ومكنوش مصدقين انهم فعلا ارتبطوا لان احمد فهمي اكبر منها بكتير وكان متجوز قبل كدا ، لكنهم حبوا بعض وعلاقتهم استثنائية ومختلفة وجمهورهم حب يسمع قصتهم لما طلعوا حكوها مع منى الشاذلي
وبعد فرحهم سافروا شهر العسل لكن للأسف ملحقوش يتهنوا ، شكلهم كدا كانوا واخدين عين ، وهنا اتعرضت لتعب شديد وقضوا الهاني مون في المستشفى لحد ما اتحسنت وكان احمد بيطمن جمهوره عليها دايما
طب ايه فيلم مستر اكس ده بقى وبيتكلم عن ايه ؟
ده عمل جديد بيجمع احمد فهمي وهنا الزاهد و بتدور قصته حولين رئيس عصابة هيقابل محامية بالصدفة وهيحاول يبعدها عن طريقه عشان يحميها من مخاطر العصابة
الفيلم شكله حلو ولطيف وهيحقق ايرادات عالية ، وفي نجوم كتير هينجحوا الفيلم مع الابطال ، منهم أوس أوس، وبيومي فؤاد، ورحاب الجمل، ومحمود حافظ، وكمان هيظهر فيه نجوم كتير كبار بس كضيوف شرف ، وهما أكرم حسني، ومصطفى خاطر، ومحمد أنور، وصبرى فواز، وعمرو يوسف ،، يعني توليفة كبيرة من النجوم وشكله كدا هيكون فيلم حلو ومختلف لان احمد فهمي بقاله كتير معملش افلام هو وهنا مع بعض.
