لا يوجد شك أنها من جميلات الدراما المصرية، تلعب الأدوار الرومانسية والبنت الحلوة الكيوت التي تخطف القلب والعقل، والحق هي جميلة فعلا وملامحها هادية، ولكن تفاجئنا بها تخرج الثعبان الذي يوجد بداخلها في مسلسل قالب الدنيا على السوشيال ميديا الآن.. هي إيمان العاصي والمسلسل طبعا هو جعفر العمدة..
فنانة فاتنة وجميلة من مواليد 1985، وجمالها اللافت كان سر دخولها مجال الفن، لأن الموضوع مكنش في بالها أصلا، ولكن في مرة كانت بتعمل جلسة تصوير، فاستأذنها المصور ينزل صورها في مجلة، فشافها المخرج خالد بهجت ورشحها لدور فيلم «أمس لا يموت»، ومن هنا بدأت مسيرتها الفنية عشان تترشح بعديها «أحلام في البوابة» مع الفنانة سميرة أحمد، ومنه لمسلسل «حضرة المتهم أبي»، وتتوالى أعمالها الفنية.
اللافت إن إيمان العاصي في مسيرتها كلها مكنتش بتقدم أدوار صعبة أو مركبة، أو بتحتاج منها تمثيل كتير، لأنها طول الوقت بتلعب دور البنت الجميلة الرومانسة، وهي أصلا حلوة ورقيقة فالموضوع بالنسبالها عادي كأنها مش بتمثل.
ولكن الجديد المرة دي واللي خلاها تمسك في الدور بإيديها وسنانها لما المخرج محمد سامي رشحها إنها تلعب دور دلال في مسلسل جعفر العمدة، ولقيت إن هو مؤمن بيها وبيغير من جلدها ومن الحاجات اللي بتقدمها على طول، فاعتبرت الموضوع بالنسبالها مسألة إثبات للذات.
الفنانة إيمان العاصي بتلعب دور دلال في مسلسل جعفر العمدة، ودي بقى الزوجة التانية، وأكتر واحدة في زوجاته اللي بيحبها، ودي حاربت أهلها عشانه، وهو حافظ عليها رغم ظروف كتير مروا بيها.
دلال هي بنت حمادة فتح الله، العيلة اللي بتمثل العداء الكبير مع جعفر العمدة، وفي بينهم خلافات كبيرة جدا، وصلت لإن جعفر أنهى حيات أخو دلال، وراح شوقي أخوها التاني حاول ينهي حياته ودخل السجن.
دلال الجميلة البريئة الكيوت، مع توالي الأحداث بنكتشف إنها شر متحرك على رجلين بيتجسد في وش براءة، وعملت حاجات لو جعفر اكتشفها مش هيكفيه فيها رقبتها، وكل يوم عن اللي قبله بتظهر حاجات دلال عملتها ميبانش إنها متطلعش منها خالص.
يمكن دلال من الشر والغباء اللي في قلبها تجاوزت شخصية وداد اللي بتلعبها الفنانة جوري بكر كمان.
هنكتشف إن دلال هي اللي ورا خطف ابن جعفر، وإنها مكنتش حامل وسقطت زي ما كانت مفهماه وإنها مبتخلفش أصلا، أجرت بلطجية عشان يعتدوا على أخوها شوقي وتاخد منه تليفونه اللي عليه دليل ضدها، وأجرت ناس عشان ينهوا حياة بلال شامة عشان ميفضحهاش عند جعفر العمدة.
فوق كل ده دلال لسة بتخطط لشر أكتر هيظهر خلال الحلقات الجاية، عشان تنتقم من عايدة مرات جعفر الرابعة واللي خدت مكانة أكبر في قلب جعفر العمدة.
شخصية دلال حسب ما هي مرسومة في السيناريو وإن كان صناع العمل مركزوش على النقطة دي، ولكن هي أقرب لنوع المجرم السيكوباتي، وده أشد أنواع المجرمين شرا، وده بيكون عنده شعور بالأنانية والسمو والتضخم النفسي وفوق كل ده الاستهتار واللامبالاة، ولو بصينا لشخصية دلال هنلاقي فيها كتير من الصفات دي.
دلال شايفة إنها أحسن من كل زوجات جعفر العمدة، ولما حست إن في واحدة هتخلف منهم خطفت ابنها، ولما ظهرت واحدة تاني هيكون ليها مكانة أكبر عايزة تقضي عليها.
عموما إيمان العاصي نجحت بشكل كبير، ومن وقت عرض المسلسل منزلتش من بيتها عشان خايفة من رد فعل الجمهور، وبنتها بتقولها فضحتيني وسط اصحابي، وبتسألها انتي فعلا خطفتي بن جعفر؟ عموما إيمان العاصي اتجوزت مرة واحدة وخلفت بنتها ريتاج واللي طالعة قمر زيها.
