لم يتخيل أحد في يوم من الأيام إن الخناقة على التلفزيون ستكون بين 2 مذيعات بسبب الرجل، رضوى الشربيني بعد ما كانت مسيطرة في المجال وكل يوم والثاني مطلعة عين الرجالة تصريحات ومواعظ، دخلت ياسمين عز على الخط ونصبت نفسها محامي الجنس المش لطيف، تعالوا نشوف الحكاية وصلت لفين.
من بلوق بلوق بلوق، لـ جوزك هو ريس المركب، الجمهور على السوشيال ميديا مبقاش عارف يصدق مين ويتريق على مين.. والستات يا عيني ما بين إنها تتنازل عن السيطرة وتقتنع إن جوزها هو سيد الموقف، وما بين إنها تنشف وتاخد حقها من عين الراجل.
الناس الناصحة بقى شايفة إن ياسمين عز هي رضوى الشربيني بس في عالم موازي، الاتنين بيلعبوا على التريند ونص الكلام اللي بيقولوه مش مقتنعين بيه أصلا، بس جايب لهم الشهرة والانتشار اللي كانوا بيدوروا عليه، وكل ما الناس تشتمهم أكتر كل ما السبوبة تحلو.
رضوى في برنامجها “هي وبس”، واخدة خط الست هي صاحبة الحق الأول والأخير، ولا راجل يضربها، ولا حماتها تدخل في حياتها، ولا تيجي على نفسها عشان الحياة تمشي وخلاص.
قامت ياسمين عز خصصت “كلام الناس” كل يوم، عشان تبوظ خطة رضوى الشربيني، وتقنع الست إنها تسامح الراجل لما يضربها، وتدي حماتها مفتاح شقتها برضاها، وآخر حاجة تعملها إنها تفكر في نفسها.
رضوى الشربيني صاحبة أعلى وأجرأ صوت على التلفزيون، وبكل قوة بتقول للستات يعملوا بلوك للي مضايقهم في الحياة، طلعت ياسمين قصادها باختراع الصوت الشتوي، الناس مبقتش عارفة تعمل ايه على رأي حزلقوم في “لا تراجع ولا استسلام”.
ياسمين عز بتقول إن الراجل المصري أحن واحد في الدنيا، ورضوى الشربيني مخصصة برنامجها كل يوم لقضايا محكمة الأسرة اللي بتبين قد ايه الراجل ولا حنين ولا بيفهم في معاملة الستات، وهما سبب خراب البيوت أصلا.
رضوى شايفة إن الست مش ملزمة ولا تطبخ ولا تغسل ولا تحقق للراجل أحلامه، وياسمين بتقول:” بلاش تسخين احنا عمرنا ما سمعنا الكلام ده زمان، الست ملزمة أوي، ومن حق الراجل عليها إنها تدلعه”.
حتى في قضية عروسة الإسماعيلية، الاتنين استغلوا التريند على هواهم، رضوى طلعت وقالت أدي أخرت اللي تسكت على حقها وتسامح الراجل اللي مد إيده عليها، وياسمين عز عملت قصيدة مدح في البيت اللي جوزها ضربها ورجعت له عادي وسامحته وادته فرصة، ماهو ده اللي اتعودت عليه في بيتها زي ما بتقول.
رضوى الشربيني من مدرسة “لو عندي صباع بيوجعني أقطعه، ولو قالك مع السلامة يبقى ستين مع السلامة”، إنما ياسمين عز شايفة أن الراجل ميسدش مكانه حاجة، ولو صاحبتك قالتلك قوليله مع السلامة،سيبي صاحبتك عادي، المهم سبع البرمبة ميبعدش عنك
