في الوقت الذي يجلس فيه حسن يوسف في بيته كافي خيره شره ، وليس له علاقة بأي شئ يحدث بالوسط الفني نهائي هو وزوجته شمس البارودي، طلع علينا ابنه عمر بأراء ومواقف دائما تعرضه لهجوم والناس بقول كيف يكون هذا هو ابن شمس التي اعتزلت وتابت ؟
عمر حسن يوسف بيفكرنا شوية بأبوه في شبابه ، متهور حبتين ، لكنه متعملش الدرس من باباه بعد العمر الطويل ده ، كمان جرئ في كلامه وتصريحاته ومش بيخاف ينتقد اي حد عادي، عنده جرأة غريبة كدا.
ابن حسن يوسف وشمس البارودي كان في لقاء اعلامي وقال انه معندوش مانع انه يعمل مشاهد ساخنة يعني فيها بوس واحضان ، زي اللي كان بيعملها حسن يوسف وهو صغير.
وكمان قال ان ابوه مش هيعترض على حاجة زي دي ، وهيسيبه ياخد قراره بنفسه ، وقال انا عندي 39 سنة ومسؤل عن قراراتي ، وبرجع لحسن استشيره لكن انا اللي بقرر.
الاب والام معتزلين ومختفيين تماما عن الانظار وبيحاولوا يعملوا حاجة كويسة لاخرتهم بس ابنهم لسة في مرحلة الطيش ، وملوش دعوة بيهم وعايز ينطلق ويمثل ويكبر على حس ابوه.المفاجآة الأكبر بقى ان عمر بيحاول يخلي والدته ترجع تاني تظهر ، بعد ما اعتزلت شمس البارودي بقالها سنين طوووويلة ورفضت كل العروض اللي جاتلها والفلوس الكتير اللي اتعرضت عليها لكنها قالت انها مش هتمثل تاني مهما حصل وكمان مبقتش تحب حد يتفرج على افلامها زمان عشان متاخدش ذنوب.
عمر بقى قرر يعمل فيلم وثائقي عن والده ووالدته حسن يوسف وشمس البارودي ، رغم انه عارف انها هترفض تظهر، إلا انه اصر وحاول يقنعها بكل الطرق انها تشارك في الفيلم ده بنفسها اللي هيحكي قصة حياتهم.
قدر يقنعها فعلا وقال انها وافقت تظهر وده هيكون اول ظهور ليها بعد سنين الاعتزال ،لكن بس هتطلع تحكي مشوار حياتها وازاي قررت تعتزل وتبعد عن الوسط الفني خالص وتختفي كل السنين دي.
واضح ان افكار عمر مختلفة عن باباه ومامته ، وهما سايبينه يعمل اللي هو عايزه براحته زي ما كانوا هما كمان كدا زمان ، ولما كبروا خلاص فهموا واختاروا يعملوا ايه في حياتهم.
عمر بقى بيدافع عن باباه ومامته باستماتة لدجة انه شتم حسين فهمي لما مدعاش والده لمهرجان القاهرة السينمائي وقال حسين وقتها ان حسن يوسف حرم الفن وعشان كدا مدعتوش.
طبعا حسن يوسف مردش و لا اتكلم ، لكن ابنه عمر مقدرش يسكت ودخل في تلاسن كبير جدا مع حسين فهمي ، وكتب على حسابه على فيسبوك وقال : “ابويا لما شبع تمثيل كنت أنت لسه بتحبي على أي فرصة يا حسين يا فهمي”.
ومش كدا وبس ده كتبله عريضة وقاله : ازاي الدولة تكرم فنان بوسام العلوم والفنون من الطبقة الاولى، ويطلع رئيس مهرجان القاهرة يقول أصل الفنان ده متعزمش عشان بيحرم الفن ؟ لا أنت محتاج لما تتعين في منصب زي ده تراجع كده وتعرف التاريخ كويس عشان أكيد الدولة بتفهم أكتر منك، بس واضح إنك جاي كومبارس وطلعت حافظ كلمتين خايبين زيك”
الصراحة رد فعل كبير اوي وغلط في حسين فهمي جامد ويمكن مكنش قصده اهانة في الاساس لوالده حسن يوسف ، دول حتى جيل واحد ، لكن حسين فهمي كان يقصد يقول ان حسن يوسف اعتزل وكدا كدا مش هيحضر مهرجان سينمائي فطبيعي انه متجلوش دعوة ، لكن عمر خدها على قلبه اوي ورد بدل ابوه ومسك حسين فهمي على الفيسبوك واحرجه قدام الناس
لكن من يومين في اخر ظهور ليه ، اعتذر عمر ل حسين فهمي وقال : هو أستاذي، وأنا كتبت الكلام بطريقة عفوية ومتأسف عليه .. حسين فهمي قامة كبيرة وأستاذ كبير، وبحبه على المستوى الشخصي وإحنا جيران ومعرفتنا كويسة”
وبرر عمر هجومه الفظيع على حسين فهمي وقال : أنا لما حد يغلط في أبويا وأمي مبعرفش أحسبها، وممكن حد يفكر لما أكتب تصريح مش هشتغل، لكن والدي مردش على تصريح حسين فهمي ومعندوش فيسبوك ، وانا رديت بالنيابة عنه طبيعي
