كل مرة يظهر فيها للجمهور بكشف عن مفاجأة جديدة أغرب من السابقة ويجعل المشاهدين في حالة ذهول واستغراب بسبب أمواله ومن أين امتلك كل هذه الثروة، وخاصة بعد ظهوره الأخير بجاكيت سعره خيالي، سوف نعرف سعره وقصة الصابونة الذهب التي يستخدمها من خلال التقرير التالي:
محمد رمضان وكالعادة مفيش مناسبة تعدي عليه من غير مايبقى تريند، وده اللي حصل بالظبط بعد ظهوره مع منى الشاذلي في ليلة رأس السنة.
الفنان كان لابس جاكت ممكن يبنلك انه عادي بس لما تدور وراه هتعرف ان انت اللي غلبان، جاكيت محمد رمضان من تصميم دار أزياء فيندي Fendi، وسعره إلى 3906 دولارات، يعني حوالي 96 ألف جنيه مصري زي مالموقع بيقول.
افرض بقى انك موظف في القطاع الخاص وبتاخد الحد الأدنى اللي لسة مطبق جديد، كده هتقبض 2700 جنيه، يعني لو حسبتها هتلاقي ال96 ألف جنيه دول يكفوا مرتبات 35 موظف في الشهر، وده عدد موظفين ممكن تعمل بيه شركة لسة بادئة.
بلاش دي عارف احنا لو افترضنا ال96 ألف جنيه تمن جاكيت محمد رمضان هما إجمالي مرتبك في السنة هتقبض كام في الشهر؟ 8 آلاف جنيه مرة واحدة ، مش بقولك فتان مثير للجدل.
طيب تعرف ان الفنان بيغسل وشه بصابونة دهب عيار 24، اه والله زي ماسمعت، الحكاية بدأت من فيديو نزله محمد رمضان على صفحته بيقول فيه: انا استلمت هدية غريبة أغلى صابونة في العالم، ومصنوعة من الذهب عيار 24, الصابونة دي جتلي عشان أغسل بيها وشي، عشان بعد كدة لما أدي لحد الصابونة ميزعلش يفرح: مستخسر فيها الليفة والله!
الصابونة الواحدة فيها 17 جرام من مسحوق الذهب الخالص، و3 جرامات من مسحوق الماس، مخلوطة بالزيوت النقية، والعسل العضوي، والعود المعتق، والتمر، وتصنيعها بياخد 6 شهور. الصابونة دي تمنها 2800 دولار، وبتنتجها شركة خان ومتوفرة في عدد من المتاجر الحصرية في الإمارات.
وطبعا الكل لاحظ ازاي محمد رمضان بيظهر في حفلاته بملابس ذوقها غريب وفيها مبالغة شديدة عشان كده منى الشاذلي انتهزت الفرصة وقالتله يامحمد يارمضان إيه الهدوم اللي بتلبسها دي؟
وكان رد الفنان ان الشغل عاوز كده، هو لما بيروح حفلة بيحاول يلبس يبقى قريب من ثقافة الناس اللي هيغنيلهم عشان يتقبلوه، يعني لو حفلته في المغرب بيروح لمصصم مغربي ويقوله اختارلي حاجة على ذوقك.
مثلا مرة كان مشارك في مهرجان خاص بافريقيا فيعمل إيه؟ راح لمصمم سنغالي اقترح على محمد رمضان بدلة بيلبسها تجار الماس وصراحة البدلة كان ذوقها صعب اوي لدرجة ان اخو محمد رمضان قاله لو لبستها انا معرفكش.
بس الفنان صمم يلبسها عشان يعجب الجمهور، وأكد إن اللبس الغريب ده للحفلات بس، إنما في العادي بيلبس شبه الناس، فهل انتوا معاه في رأيه؟ طيب أغلى طقم لبستوه كان بكام؟
