طبعا كلنا فاكرين النقيب تيسير فهمي .. هذا الاسم ليس غريب عليكم صح ؟ نعم هو الشخصية المشهورة التي قدمها النجم شيكو في مسلسل الرجل العناب الذي عرض من حوالي عشر سنين وكان بداية انطلاق النجوم الثلاثة شيكو وهشام وفهمي
شخصية النقيب تيسير فهمي دي بقى رجعت تريند تاني رغم ان المسلسل عدى عليه عشر سنين بحالهم .. طب ايه اللي حصل عشان يرجع شيكو يتصدر التريند بدور قديم عمله في بداياته ؟ .. انا هقولك
انتشر فيديو على السوشيال ميديا لطفل صغير اسمه زين وهو عامل شخصية تيسير فهمي بالظبط ، نفس الشكل والخدود و الشنب كمان لدرجة تحسان الواد ده ابنه فعلا في الحقيقة
الفيديو ده اتصور في حضانة في العراق ، وكانت المدرسة بتحاول تعلم الاطفال اسماء العيلة بالانجليزي فقالت تمثلهم الشخصيات ، وجابت الطفل ده وحطلته شنب عشان يقوم بدور الاب وصوروا الفيديو والمدرسة بتعلم الاطفال كلمات father و mother و sister ، والفيديو انتشر على تويتر وتيك توك وعمل حوالي 7 مليون مشاهدة
الفنان شيكو نشر ستوريهات كتير عنده على انستجرام لصور الطفل بالشنب ومنبهر انه طالع شبهه بالشكل ده وكل ما يلاقيله صورة يشيرها عنده
الناس مش مصدقة ان الواد نسخة طبق الاصل من شخصية النقيب تيسير فهمي اللي عملها شيكو زمان ونجح فيها جدا وكان من اهم الادوار اللي عملها في حياته
ونشروا صور الطفل زين وصور لشيكو في المسلسل وابتدوا يعلقوا عليها ويربطوا بين الطفل زين وشيكو ، ومن التعليقات الظريقة على الفيديو : يعني متأكدين أن ده الأب مش النقيب تيسير فهمي؟». فيما علق آخر «أكيد دا ابن النقيب تسير فهمي وكبر وراح المدرسة
الطفل ده قدر في لحظة يرجع شيكو ومسلسل الرجل العناب للتريند من تاني بعد مرور 10 سنين على عرض المسلسل اللي شوفناه في 2013، والمسلسل ده تحديدا نجح جدا بين الشباب ولسة بيتفرجوا عليه لحد دلوقتي وبيتعمل عليه كوميكس على الفيسبوك
واول ما بدأ شيكو وهشام ماجد و احمد فهمي كانوا ثلاثي جميل وخدوا اتجاه لوحدهم كدا وفضلوا يعملوا فيلم كل سنة ولا سنتين ، بدأوا بفيلم ورقة شفرة سنة 2008 ، وبعدها عملوا فيلم سمير وشهير وبهير في 2010 ونجح نجاح رهيب
وفي 2012 عملوا فيلم بنات العم واللي برضه كان مفاجآة للجمهور وفيه فكرة مختلفة وكسر السينمات
وفي 2013 عملوا مسلسل الرجل العناب ، وده كان اول عمل درامي يشاركوا فيه مع بعض بعد تجربة الافلام ، والمسلسل نجح برضه لكن يمكن دلوقتي بيتشاف اكتر من زمان بعد ما بقى اسم شيكو مرتبط بكل حاجة دمها خفيف ولذيذة لو عايز تفصل وتتفرج على حاجة حلوة وكوميدية ، فبقى اختيار مسلسل الرجل العناب هو المتفق عليه في الحالة دي.
ولما دنيا سمير غانم عملت مسلسل نيللي وشريهان في سنة 2016، ظهر النجم شيكو نعاهم ضيف شرف في حلقة وطلع بشخصية النقيب تيسير فهمي اللي كان عاملها زمان في الرجل العناب ، وده لان الشخصية دي تحديدا معلقة مع الناس وكلنا حبناه وارتبطنا بيه.
وفي 2014 عمل شيكو وفهمي وهشام فيلم الحرب العالمية التالتة ، وده كمان كان فيلم جامد جدا ومحدش ينسى دور شيكو وهو عامل شخصية توت عنخ امون.
وده كان اخر فيلم يعمله الثلاثي من بعض ، وفجأة قرر احمد فهمي انه ينفصل عنهم ويشتغل لوحده ، لكن شيكو وهشام كملوا المسيرة وكملوا مع بعض وبعدها عملوا فيلم حملة فريزر وقلب امه.
وطبعا مؤخرا شيكو وهشام عملولنا مسلسل اللعبة اللي من احلى المسلسلات الكوميدية اللي ممكن تتفرج عليها في حياتك وهو 4 اجزاء ، حاليا بيتعرض الجزء الرابع باسم اللعبة – دوري الأبطال.
شيكو عامل شخصية وسيم ، وده كمان دور ارتبط بيه الناس لدرجة اننا صدقنا ان ده شيكو في الحقيقة .. هو نجم رايق وبيعرف يختار ادواره صح ويخلي الناس تتعلق بالشخصيات اللي بيعملها.
