المطرب عمر كمال مل من كثرة الكلام عن علاقته بسيدة الأعمال ندى الكامل طليقة الفنان أحمد الفيشاوي .. فاضطر يخرج يتحدث لأول مرة عن هذه العلاقة.
وكمان خد قرار غالبًا سمع فيه صوت مامته.. ياترى هيبعد عنها خالص ولا هيعمل إيه .. وياترى مامته رأيها إيه في الموضوع ده وإيه هو قراره المفاجئ..؟ ده اللي هقولكم عليه في التقرير التالي:
زي ضله
زي كل واحد وواحد بينفصلوا الجمهور بيتابع عملوا إيه بعد الطلاق وده اللي حصل مع أحمد الفيشاوي وندى الكامل اللي بالمناسبة شكلها اتغير خالص وخدت طريق الشغل على جسمها والظهور بشكل تاني، لكن من بعد الطلاق وكلام الناس داير على إن ندى الكامل في راجل في حياتها وده بسبب ظهورها المتكرر مع المطرب عمر كمال.
الكل قال إنهم في طريقهم للجواز والحياة حلوة معاهم بس الغريبة إن الاتنين نفوا الموضوع ده بس أفعالهم كانت بتفضحهم يعني مرة نزلوا صورة وهما بهدوم البيت ومسحوها ومرة قابلته في دبي وعملت إنها شافته صدفة وخدته بالأحضان بس الحقيقة فين أكيد هتظهر ومفيش حاجة بتستخبى.. لكن كلام عمر كمال وقراره كان مفاجأة.
هدوء ما بعد العاصفة
عارفين هدوء ما بعد العاصفة ده اللي شكل عمر كمال عايشه دلوقتي وبيحاول يبعد العيون عنه لحد ما يشوف هيقرر إيه في موضوع الجواز ده اللي بالمناسبة بردوا كان قال قبل كده إنه مش شايف نفسه عاوز يتجوز دلوقتي.
المهم عمر كمال قرر يوقف أي كلام عن حياته الشخصية خالص ومش عاوز يتكلم فيها مع حد وهيقفل الباب ده خالص ومفيش حاجة عن حياته هتطلع للإعلام لإنه طول عمره المفروض كده لكن لما بدأت تظهر حياته الخاصة للإعلام الدنيا باظت منه أيوه هو قال كده بالنص حياتي الشخصية باظت الناس لما دخلت حياتي الشخصية وأنا السبب وعاوز أخليها في طي النسيان بعيدة، وده القرار المفاجئ اللي أخده عمر بخصوص الكلام عن جوازه وارتباطه والقصص دي.
هيتجوزها ولا مش هيتجوزها
طبعًا كلام عمر كمال كان في تصريحات ليه وكان لازم يكون في حسم لموضوع علاقته بطليقة أحمد الفيشاوي وهيتجوز ندى الكامل ولا مش هيتجوزها وإيه آخرة اللي بينهم ده وخاصًة إن في كلام إن مشروع الجواز بينهم اتوقف خالص وعشام كده قال إن ندى الكامل إنسانة كويسة ومحترمة جدًا.. بس أنا ببتجمعني بيها صداقة شخصية جدًا.. ولو عمومًا في مشروع جواز سواء بيني وبينها ولا بيني وبين أي حد هقول للناس كلها تعالوا شرفوني في فرحي، يعني الكلام عايم والعلاقة شكلها مفيهاش جواز ومش عاوز يقول بس شكله سمع كلام مامته.
بتتمنى تجوزه
مامة عمر كمال كانت ظهرت في لقاء ليها وقالت إنها بتتمنى تفرح بابنها يعني هو اختار طريقه بغض النظر بقى هي راضية عن الطريق ده ولا مش راضية بس هي عازاه يتجوز ويستقر ويشوف بنت الحلال اللي يتتمنى إنه يكمل معاها لآخر العمر ولا يحصل بينهم طلاق ولا يحزنون.
وكمان قالت ياريت ميتجوزش من الوسط الفني ولو عمل كده هبقى حزينة.. وفي الغالب عمر كمال مش هيزعل مامته مرتين يعني هي مش راضية عن طريق الغنا بتاعه وكمان هيتجوز من الوسط الفني آه هي ندى الكامل مش فنانة بس ليها علاقات بالوسط وعارفة فنانين وفي فنانين كتير يعرفوها ومامة عمر عاوزاله واحدة بعيدة خالص عن السكة دي وهنشوف إيه اللي هيحصل.
اكتبولنا في الكومنتات.. تفتكروا عمر كمال وندى الكامل هيفاجئونا ويتجوزوا ولا مشروع الجواز ده خلاص بخْ واكتفوا يكونوا أصدقاء بس؟ وهل عمر كمال هيسمع كلام مامته في موضوع الجواز من بره الوسط ده ولا إيه؟.
