مهما مرت السنين ستظل نرمين الفقي الست الحلوة القمر التي لا تكبر وفتاة احلام كل الشباب ، هي فتاة أحلام رجال كثرين من كل الاعمار ، والحقيقة هي قمر ومحافظة على جمالها وشبابها ، وحالة استثنائية في الوسط الفني.
مش راضية تتجوز رغم انها مبقتش صغيرة بس ميبانش عليها السن وتشوفها تقول ولا عندها 30 سنة وخدت لقب اجمل عذراء في مصر
نرمين الفقي عندها خمسين سنة لكن ولا باين عليها ، وكل الستات بتسأل هي ازاي لسة حلوة وجميلة كدا وهي في السن ده ومحافظة على جمالها ؟
طبعا ده ملوش بعمليات التجميل والفيلر والحاجات اللي بنسمع عنها ، لان نيرمين من ساعة ما ظهرت لحد دلوقتي وهي بنفس الشكل والملامح ومدخلتش في دايرة عمليات التجميل دي.
هقولك بقى على روشتة نرمين الفقي اللي هتخليكي حلوة طول العمر وازاي تهتمي بنفسك وتتطوري زي ما هي بتعمل .. قالت ايه بقى الست نرمين في اخر لقاء ليها من يومين ؟
قالت مفيش حاجة اسمها ست حلوة وست وحشة، ولكن في ست هي اللي بتخلي نفسها وحشة فلو تخينة المفروض تخسس نفسها، وفي حاجة اسمها ست لما تفتح بقها بتكون عاوز تقول لها اسكتي ما تفتحيش بقك، وست مش مثقفة ومش مطلعة وده اللي بيوحش الست
ايه كمان يا ست نرمين ؟ قالت لازم تلعبوا رياضة ومش لازم جيم أنا أحيانًا بلعب رياضة في بيتي، والست لازم يكون فيها أكتر من حاجة مش مجرد جمال فقط، يعني تخلي بالها من جسمها ومن نفسها وتكون ست بيت وفي شغلها تبقى ست بجد شاطرة وتحافظ على نفسها قدر المستطاع.
كمان في شوية اسرار كدا بتعملها نرمين الفقي في البيت تخص جمالها زي انها بتستخدم زيت الزيتون مع التوم لشعرها وبتقول ان الوصفة دي هايلة وبتغذي الشعر جدا
كمان حذرت الستات انهم يناموا بعد الاكل مباشرة لان دي عادة غلط وبتعمل وزن زائد ، وبتنصح دايما في كل كلامها بالدايت والرياضة وان الست متسبش نفسها مليانة ، وان هي الي في ايدها تكون حلوة او وحشة وتقدر تساعد نفسها بسهولة ، وده ملوش علاقة بالامكانيات المادية
طبعا كلنا بنسأل ليه نرمين الفقي متجوزتش لحد دلوقتي ؟هي مش عايزة تتجوز جوازة والسلام ، ونفسها تتجوز عن حب ويكون راجل محترم يصونها ، وقالت عن الموضوع ده : عمري ما قفلت قلبي وكل واحدة فينا عندها الأمومة والأنوثة، ولكن لما يجي ابن الحلال اللي يقدر يخيلها تقدم على الزواج؛ لإن الواحدة لما تشتغل وتنجح بتكون عاوزة راجل قوي وجامد تتسند عليه علشان تخلع رداء الرجولة وتبقى ست بس
وطبعا لسة بيتقدملها عرسان كتير لكن هي بترفض وملقتش الراجل المناسب اللي بتحلم بيه .. طب مواصفاته ايه ده بقى اللي نرمين الفقي مستنياه ؟
قالت انا عايزة راجل يكون متعلم ومثقف وابن اصول وأهله مربينه صح ومتدين مش مجرد كلمة علشان يقدر يحافظ عليا ومش متدلع ولا سليط اللسان
نرمين فاهمة الحياه صح ومش عايزة تتجوز اي واحد وخلاص وعندها وجهة نظر تحترم في موضوع العلاقات والجواز ده ، وقالت : الراجل الصح مع الست الصح بيحليها وبيصغرها وبيخلي نفسيتها مرتاحة، لإن من الصعب الست تعيش ست وراجل في نفس الوقت، وأنا للأسف بعيش ست وراجل بعمل كل حاجة وبدخل في كل حاجة ودي حاجة مرهقة جدًا.
