“تيمة محمد سامي محمد رمضان” يظهر إنها ستكون على المائدة الرمضانية السنين القادمة، يمكن لإن الاثنين يحققوا نجاح كبير مع بعض، محمد رمضان له شعبية كبيرة ويجد نفسه ممثل جيد يحصد المشاهدات العالية مع سامي، وسامي يعرف كيف يوظف شخصية محمد رمضان.
وده اللي كشفه غياب سامي السنة اللي فاتت تحديدًا عن الدراما ككل واللي كان كفيل إن رمضان يتعرض لانتقادات بسبب مسلسل “المشوار”.
الغياب اللي كان بمثابة عقاب لمحمد سامي على فضيحة مسلسله “نسل الأغراب” مع أحمد السقا وأمير كرارة توقع البعض إنه يطول في ظل سيطرة المتحدة على كعكة دراما رمضان لكن سنة كان وشها وحش على رمضان وسنة وشها وحش على سامي خلت الاتنين يعرفوا قيمة تعاونهم مع بعض وكمان المتحدة عشان هي شركة كبيرة لقت إن دي فرصة متتفوتش وده اللي كان ملحوظ في نجاح “الأسطورة” و”البرنس”، فإيه اللي خلى سامي يرجع بالسرعة دي وتوقعات الجمهور لاختفاؤه تخيب؟.
محمد سامي وخسائر فادحة للمتحدة
اتردد في الكواليس إن محمد سامي اتسبب في خسائر مادية فادحة للشركة المتحدة بسبب مسلسل “نسل الأغراب” اللي حاول فيه إنه ينجم زوجته الفنانة مي عمر ويديها مشاهدة زيادة على حساب بطلي العمل السقا وكرارة وده اللي خلى الشركة توقف التعاون معاه لكن سامي قرر ميردش على كل الانتقادات رغم دخول فنانين على خط الأزمة لكن النار أخمدت نفسها بعد تحقيقات اتقال إنها تمت بين المسؤولين في الشركة.
هل فشل محمد رمضان بدون سامي؟
محمد رمضان متعاونش مع محمد سامي سنتين ورا بعض لقيناه في مسلسل “موسى” مع محمد سلامة” وفي “المشوار” مع محمد ياسين” ورغم نجاح المسلسل الأول بشكل كبير على المستوى الفني والتاني على استحياء لكن الشعبية الكبيرة للعملين مكانتش بحجم “الأسطورة” والبرنس” وده يمكن اللي خلى رمضان يحس بإن نجمه اتطفى شوية، ومن هنا بقى كان لازم يتحرك وده لنه شايف نفسه نجم منفرد على المائدة الرمضانية مش في بطولات ثنائية زي اللي بنشوفها في آخر سنتين تلاتة.
الثنائيات مش عيب
الناقد نادر عدلي قال إن الثنائيات بين نجم ومخرج في الدراما والسينما مش عيب لكن الممثل هيفضل ممثل دون النظر إلى اسم المخرج وقال كمان إن اللي خلى “الأسطورة” و”البرنس” ينجحوا لأنهم ميلودراما شعبية فيها مشاهد خارقة وده اللي بيطلبه الجمهور وبيحسسه بالسعادة، ورغم اعترافه إن مصر عاشت على النوع ده من الدراما لسنوات لكن ممكن عمل ينجح وعمل يفشل لكنه شايف في محمد سامي كاتب غير موهوب ومخرج متواضع وإن التركيبة دي مش هتحقق نجاح طول الوقت وشايف كمان إن رمضان بيبحث عن شهرة سريعة واللي مخليهم ناجحين هو إن الحالة الثقافية عند البعض مش موجودة.
عودة لأجل عيون مضان
مصادرنا الخاصة بقى أكدت لينا إن محمد رمضان اتوسط لمحمد سامي عند الشركة المتحدة وده اللي خلى سامي يرجع بسرعة وميختفيش زي ما توقع البعض وكان سلاح رمضان إن سامي مش هيتوقف كمخرج طول حياته وهيتعاون مع منتجين تانيين فليه بقى منقربش المسافة ونستفيد منه والكل ياكل من الكعكة زي ما بيقولوا.
ومن وجهة النظر دي قدم محمد رمضان السيناريو للشركة بالنيابة عن محمد سامي ووعد إن جعفر العمدة يحقق نجاح يعدي الأسطورة والبرنس بمراحل وده اللي شايفينه لحد دلوقتي والخلطة السامية الرمضانية محققة اللي محققهوش عمل تاني من حيث الشعبية على السوشال ميديا.
