لقطات حصرية من خطوبة حفيد عادل إمام وسر غياب الزعيم عن الحفل

تقريبًا الفنان الكبير عادل إمام وابنه المخرج رامي إمام كانوا أسعد اثنين في هذا العيد ده، وذلك لأن عادل الحفيد خطب حب عمره التي كان يتمناها.

طيب هي مين خطيبته دي واتعرف عليها إزاي وإيه قصة حبهم لبعض وإيه اللي حصل في الكواليس عشان الخطوبة دي تتم.. وكمان حتعرفوا معايا في الفيديو ده شوية تفاصيل كده عن ابن رامي إمام اللي هو العريس وحفيد عادل إمام وليه الزعيم محضرش الخطوبة دي.

العيد فرحة بس العيد في بيت عادل إمام كان فرحتين أصل صلاة النبي أول حفيد عنده خلاص بيتأهل وهيدخل دنيا.. طبعًا الجد عادل إمام شايف حفيده قدامه بيكبر والابن رامي إمام بيتمنى اليوم اللي يشوفه فيه ابنه الكبير مع عروسته عشان يجوزه ويفرح بيه.. أهو بداية الجوازة تمت على خير وخلاص حفيد عادل إمام خطب واحدة من بره الوسط الفني وتقريبًا كده هي حب عمره اللي كان بيحلم في يوم يشبكها بدبلته وتبقى على اسمه.. بس لازم نعرف بقى مين سعيدة الحظ اللي هتدخل عيلة عادل إمام وإيه اللي خلاها تتعرف على الحفيد الكبير للزعيم اللي محضرش الخطوبة دي ومين بقى عادل رامي إمام وحياته عاملة إزاي.

أحفاد عادل إمام

طبعًا عادل إمام مش محتاج تعريف واسمه لوحده كفاية تقوله في الوطن العربي كله مش في مصر بس هتلاقي الناس بتتكلم عنه لوحدها.. والزعيم ليه 8 أغلبهم بدأو يكبروا وهما عادل وعز الدين ورقية ودول يبقو ولاد ابنه الكبير المخرج رامي إمام، وأمينة وهالة وكاميليا ودول يبقوا بنات بنته سارة أم البنات، وكمان خديجة وقسمت ولاد ابنه الفنان محمد عادل إمام.

حفل مفاجئ

طبعًا مكانش حد يعرف بموضوع الخطوبة ده واللي تم على الضيق كده زي ما بيقولوا وحضره المقربين بس وخطوبة عادل رامي إمام كانت على خطيبته اللي بتشتغل مدربة لياقة بدنية اسمها فريدة أشرف وتبقى من بره الوسط الفني.. والخطوبة دي اتعرفت لما مقربين ليهم نشروا صور من حفل الخطوبة وكتبوا رسايل تهنئة واتمنوا ليهم السعادة في حياتهم اللي جاية..

وزي ما قال موقع صدى البلد بخصوص فريدة أشرف إنها ملهاش أصدقاء في الوسط الفني وشغالة مدربة لياقة بدنية وعندها 23 سنة ومتفاعلة على حسابها في إنستجرام يعني عندها كده بتاع 20 ألف متابع.. كمان بتعشق الرياضة والسفر والترحال.

حفيد الزعيم

حفيد عادل إمام بقى يبقى هو البكري وأول حفيد للزعيم من ابنه الكبير المخرج رامي إمام واسمه على اسم جده عادل.. وحفيد الزعيم مشهور باسم عادل إمام جونيور واحتفل السنة بتخرجه في الجامعة الأمريكية بعد ما درس فيها في قسم الإخراج وكان لهي تجربة إخراج فيلم قصير وده كان ضمن دراسته واسمه “انحدار” وده كان سنة 2020 وقدر الفيلم ياخد إشادة من أبوه وجده وكل المقربين منه.. والفيلم كان مرتبط بمشروع ليه في الجامعة الأمريكية واستعان في تنفيذه بأخوه عز الدين واتنين من صحابه وقعد في تصوير الفيلم ده يومين.

الغايب الحاضر

طبعًا مناسبة زي دي كان المفروض يحضر فيها الزعيم عادل إمام رغم إنه لسه كان متصور من قريب في عيد ميلاده والناس شافته وسمعت صوته.. لكن زي ما قال موقع سيدتي إن عادل إمام مظهرش في ولا صورة من جوه حفل الخطوبة اللي ضره المقربين وده دليل إنه محضرش.

لكن هو ليه مش موجود؟.. ده السؤال اللي فرض نفسه بين الجمهور وفي الغالب عادل إمام بقى خروجه من بيته قليل جدًا عكس زمان وعامل الشيخوخة سبب كبير بدليل إن رجل الأعمال نجيب ساويرس قال في تغريدة ليه إنه كان في زيارة من قريب للزعيم وشاف إنه فعلًا كبر شوية لكن صحته زي الفل ودمه لسه خفيف وبيضّحك اللي حواليه.