دائما تكون أخبار زواج جواز الفنانات مصدر فضول لكثير من الجمهور، وهذا لأن الجمهور يحب أن يعرف أكثر عن الحياة الشخصية للفنانين الذين يحبونهم، ويمكن من أغرب الأخبار عن هذا الموضوع هو تكرار زواج الفنانات حيث وصل بعضم لأكثر من 10 زواجات، فمن تتخيلوا أنها صاحبة الرقم القياسي في عدد مرات الزواج في الوسط الفني؟
بالرغم من إن فنانات كتير اتجوزوا أكتر من مرة، لكن محدش وصل لعدد الجوازات الرسمية للفنانة دي، اللي اتجوزت تقريبا حوالي 14 مرة.. عرفتو هي مين؟
طبعا ومن غير أي تفكير كلنا عارفين الفنانة والراقصة الكبيرة تحية كاريوكا، ومين فينا ما يعرفش رقصة الكاريوكا العالمية اللي قدمتها في أحد عروض فرقه بديعة مصابنى، لكن اللي مانعرفهوش بقا عند حياتها الشخصية انها كانت اكتر فنانة مصرية أتجوزت في الوسط الفني لدرجه انها أتجوزت 14 مرة أيوه والله زي ما بقولك كدا 14 مرة.
وأول جوازه في تاريخ الفنانة تحية كاريوكا كانت سنه 1939 من أنطوان عيسى واللي يبقا ابن اخت الفنانة بديعة مصابين، واللي أشهر اسلامه واتحول اسمة لمحمد المهدي، ولكن الجوازه مطولتش كتير وانفصلوا عن بعض سنة 1940.
واما المرة التانية بقا اتجوزت تحية كاريوكا من مصطفى جعفر، واللي كان عنده سينمات كتيرة ، لكنهم انفصلوا عن بعض في وقت قليل اوي.
وفي المرة التالتة أتجوزت محمد سلطان باشا وهو من اهم أثرياء مصر، واستمر جوازهم لمدة 3 شهور وبعدين انفصلوا.
وخامس مرة أتجوزت المخرج الكبير فطين عبد الوهاب، لكنهم انفصلوا بسرعه لأنه كان بيغير عليها اوي.
وبعدها اتجوزت من الفنان أحمد سالم، واللي انفصل عن زوجته أمينة البارودي علشان يتجوز تحية كاريوكا، وبعدين سافروا سوا رحلة لفلسطين وهناك اترددت اشاعات كتيرة عن وجود قصة حب بين أحمد سالم والفنانه اسمهان ، ولاشاعات دي كان سبب في انفصالهم عن بعض قبل رجوعهم للقاهرة ودي كانت المرة السادسة .
واما المرة السابعة اتجوزت تحية كاريوكا من حسين عاطف الطيار الخاص للملك فاروق واستمر جوازهم لمدة لشهرين بس.
وبعدها أتجوزت للمرة التامنه من الفنان رشدي أباظة، اتجوزتة وسافروا مع بعض لبنان و هناك ضبطته داخل احد ملاهي شارع الحمراء في وضع حميم مع بنت فرنسية اسمها “آني بارينه” واللي “مسكتها تحية كاريوكا من شعرها وضربتها وبعد ما اخدت حقها منها وطلبت الطلاق في نفس اليوم.
والمرة التاسعه اتجوزت من البكباشي مصطفى كمال صدقي واللي كان احد ضباط الملك وانفصلت عنه لما تم اعتقاله بعد الثورة سنه 1952.
والمرة العاشرة ومش الأخيرة اتجوزت شاب اسمه عبد المنعم الخادم كان وسيم وغني كالعادة وكل البنات كانت بتجري وراه، جوازهم استمر لمدة 5 سنين بس وبعدين انفصلوا سنه 1956 بعد ما اصر انها تعتزل الرقص.
والمرة ال11 أتجوزت من البكباشي طبيب حسن حسين،لكن انفصلوا عن بعض بعد ما اكتشفت انه كان علي علاقة مع المطربة اللبنانية صباح، ولأنها كانت بتحبه اووي قررت انها تنتحر ولكنها فشلت ونجيت من الانتحار بصعوبة.
وفي سنه 1959 واتجوز المطرب الصاعد وقتها محرم فؤاد، وانفصلوا برضوا بعد شهور قليلة ودي كانت الجوازة رقم 12
في المرة 13 واللي قبل الأخيرة أتجوزت من أحمد ذو الفقار صبري، واستمر جوازهم لمدة سنه.
وفي المرة الأخيرة أتجوزت من الكاتب المسرحي الراحل فايز حلاوة، واستمر جوازهم ل 18 سنه ودي أطول فترة في تاريخ زيجات الفنانة تحية كاريوكا لكن للأسف انتهت بمشاكل وخلافات ما بينهم.
وللي ما يعرفش فالفنانة تحية كاريكوي اسمها الحقيقي «بدوية تحية محمد علي النيداني كريم»، من مواليد مدينة الإسماعيلية، وانها هربت من أهلها وراحت القاهرة واتعرفت هناك علي الراقصة سعاد محاسن التي اكتشفت موهبتها، وبعدها راحت عند بديعة مصابني بعد سفر الراقصة سعاد إلى الشام، وأعادت بديعة مصابنى اكتشاف تحية وضمتها إلى فرقتها.
ودي كانت بداية شهرة لفنانة تحية كاريوكا الحقيقية، لتنطلق بعد كده للسينما والمسرح بمساعدة سليمان باشا نجيب، ومن الأسرار الغريبة اللي محدش يعرفها عن الفنانة تحية كاريوكا إن شهرتها كانت السبب ورا انفصال أختها فاطمة من جوزها علي الجداوي.
