لن تتخيل نتيجة الثانوية العامة لأبرز نجوم الفن..الهضبة سيفاجئك

لا صوت يعلو فوق نتيجة الثانوية العامة اللي عاملة قلق ورعب في كل البيوت المصرية ، لكن خلينا متفقين انها مش مقياس للنجاح وان في ناس كتير مشاهير قدروا يحققوا حاجات مهمة وكبيرة في حياتهم حتى ومكنوش موفقين في الثانوية العامة

كتير من النجوم اللي بنحبهم و بنتفرج عليهم و بنحسدهم على حياتهم و فلوسهم مكنوش شاطرين ولا جابوا مجاميع عالية ، بالعكس ده في كتير منهم سقطوا و عادوا الثانوية العامة كدا مرة لحد ما نجحوا بالعافيه و بأقل مجموع لكن قدروا يعملوا ثروة و شهرة وفلوس تخليك تنسى اصلا مجموع الثانوية العامة ده، تعالى اصدمك و اقولك اشهر نجوم الوسط الفني دول كانوا جايبين كام:

أول واحد هيصدمك عمرو دياب اللي كان جايب 60% ، وطبعا مكنش يتخيل انه هيكون الهضبة ويوصل للي هو فيه دلوقتي ، كان عنده طموح وشايف نفسه صوته حلو وعايز يغني ويتشهر، وفعلا عمل اغنية مخصوص للثانوية العامة بصوته يمكن كتير ميعرفوهاش غناها في تتر مسلسل كوميدي اسمه مش معقول ، وقال فيها : يا صم صم يا ثانوية يام العقل اصم ,, مالك كدا مستقوية وكاتمة ع الاعصاب والدم ” ،، ورغم كدا كلنا بنتمنى نبقى في ربع شهرة الهضبة و وعندنا شوية من ثروته .. ربنا يزيده مش بنحسد ولا حاجة

محمد هنيدي بقى نجم الكوميديا مكنش موفق اوي في الثانوي ، وجاب 57 % وحكى القصة دي كتير واتريق على نفسه وقال ان ده عدل ربنا ومزعلش من النتيجة لان ده كان سبب انه يتجه للتمثيل ، والمجموع ده دخله كلية حقوق وبعدها قرر يحقق حلمه وينجح في حاجة تاني ودخل عالم الفن من اوسع ابوابه ومع بداية التسعينات قدر هنيدي يكون اهم نجوم كوميدي في مصر.

الصدمة بقى كانت في حكاية احمد حلمي اللي سقط ٣ مرات .. يعني النجم اللي كلنا بنعتبره نموذج شبابي ناجح وبنحترمه كان فال في الثانوية العامة و اه اكبر مثال يخليك متفقدش الامل.

حلمي كان جايب 50 % في ثانوية عامة و مكنش بيحب المذاكرة وعادها 3 مرات عشان مكنش بيجيب مجموع يخليه ينجح ويعدي السنة ، وفي المرة التالتة ربنا كرمه بخمسين في المية ومكنش مصدق نفسه اصلا انه جاب الرقم ده.

حلمي كان بيتعامل مع الثانوية العامة دي بطريقة مختلفة خالص، وكل مرة كان بيسقط فيها كان بيروح يدهن اوضته لون جديد قال يعني عشان يعمله تأثير نفسي كويس ويعرف يذاكر ، لكن سقط مرتين وفي التالتة جاب 48 واتحسبلته 50 % عشان كان معفي من الفرنساوي وقتها لانه كان عايش في السعودية، اما بقى مراته منى زكي كانت اشطر من حلمي بكتيييير وجابت 95 % ودخلت كلية الاعلام.

طب خد عندك كمان .. امير كرارة باشا مصر قعد 8 سنين في ثانوية عامة و كل سنة يسقط وميجبش مجموع يدخله حتى معهد ، وفضل على الحال ده 7 سنين متواصلة واهله كانوا زهقوا منه ، وفي السنة التامنة بقى ربنا كرمه وجاب52 % ونجح بدرجات التفوق الرياضي وعدى من الثانوية بعد ما بقى سنه كبر على طالب ثانوي.

اما بقى نمبر وان محمد رمضان اللي يعتبر من اغنى النجوم في الوطن العربي ، اتكلم عن مووضوع الثانوية العامة ده و حب ينقل للطلاب خبرته و يشجعهم انهم ميفقدوش الامل وان المجموع ده مش نهاية الدنيا بالعكس يقدروا ينجحوا في اي حاجة تانية.

وقال لكل الطلبة : أحنا أقوى من كده ومن أى ضغوط نفسية، سواء فى الحياة أو العمل أو الدراسة ، أهم أسباب النجاح قوة التحمل، وأن يبقى الشخص غير قابل لليأس.. أرجوكم أى طالب يفكر ينهي حياته بسبب المجموع فدي فكرة جبانة ، واحنا مش جبناء وعندنا ارادة ،، أرجوكم وأوجه كلامى لكل إخواتى طلاب الثانوية العامة ، لو بتحبوا بلادكم وربنا وأنفسكم تراجعوا عن أى فكرة شيطانية، لازم تبقوا أقوى من كدا، فيه حاجة جواكم اكتشفوها وأعرف أنك شاطر فى أيه”.