قال الفنان أحمد عزمى كنت في السجن فى الفترة الاولى ٢٠١٣ سجن الزقازيق، ورئيس مباحث السجن كان بيجيب لى كتب معاه وبعد كده اقترح على إدارة السجن انى اشتغل فى المكتبة واستفدت كتير منها .
وأضاف عزمى خلال لقائه مع الإعلامى دكتور عمرو الليثى بيرنامجه واحد من الناس على شاشة الحياة ، وحيد حامد بعت لى وقال لى انا باعت ليك علشان اعرف انت بقيت كويس ولا لسه مجنون، واشتغلت معه الجزء الثانى من مسلسل “الجماعة” استكمالا لشخصية عبد الرحمن فى الجزء الأول واللى اخدت عليها جائزة.
و اضاف الوسط الفنى لم يساعدنى بعد الخروج من السجن و محدش سأل عليا، بس انا اللى كنت غلطان وانا أعذرهم، والود بينى وبين الزملاء موجود وبكلمهم ، بس هما كانوا مستنيين منى انى اثبت ليهم انى خلاص رجعت وتخلصت من الإدمان .
وقبل الحبس روحت لدكتور نفسي علشان دور مدمن كنت بعمله، وبعد ما خرجت رشح لى دكتور، وقال لى انت خلاص جسمك تخلص من أى مخدر بعد السجن، لكن انت محتاج نصائح و كنت بتابع مع الدكتور .
ووجه عزمي رسالة للاعلام والوسط الفنى والجمهور إني أنا ابنكم وغلطت والحمد لله كان ليها مردود عند الناس وأنا حاسس بيه .
وأضاف عزمى بعد أزمة الادمان والتعافي اشتغلت بأجر زهيد بسبب الازمة اللى حصلت لى ، ومها سليم مثال للمنتج اللى تحب تشتغل معاه، وكنت عامل دور ضيف شرف حلقتين فى مسلسل ٣٠ يوم مع اسر ياسين و طلبت اجر، وفوجئت بمها سليم ضاعفت الأجر، وقالت ليهم أحمد عزمى نجم كبير، مع ان ناس استغلت الازمة و بدل ١٠٠ ألف ادونى ٣ آلاف جنيه .
وعن اقرب الاصدقاء أجاب ياسر جلال وعمرو عبد الجليل من الزملاء اللى بحبهم جداً، و احمد رزق طبعا صديق عمر واشتغلت معاه مسلسل الجبالى .
