المخرج محمد سامي اشتهر في الوسط الفني بإنه كثير الخلافات مع الفنانين الذين يعملون تحت قيادته وطبعًا حكايته مع الفنانة غادة عبدالرازق أشهر من النار على العلم.
لدرجة إنهم مقاطعين بعض ومبيتكلموش ومشوفناش أي إشارة لسغل يجمعهم افترة الجاية، والفترة اللي فاتت غادة عبدالرازق رمت كعب كده لعل وعسى المية ترجع لمجاريها بس محمد سامي قرر يقطع الطريق عليها، طيب إيه اللي عمله محمد سامي وإزاي تصرف غادة طلع على فاشوش؟، خليكوا معانا في الفيديو ده هنقولكم الحكاية كاملة.
الصلح ممنوع والقطيعة مستمرة
والمخرج محمد سامي هو نجم الساعة الفترة دي بسبب النجاح الكبير اللي حققه مع محمد رمضان في مسلسل “جعفر العمدة” اللي اتعرض في دراما رمضان 2023، وفرحان بالنجاح ده وبيظهر في برامج طبعًا بيحصد اللي زرعه، المهم ف وسط الكلام جت سيرة الصلح مع غادة عبدالرازق بعد خلافات بينهم مستمرة من سنين طويلة، وغادة رمت بياضها خاصة إن نجاح أعمالها مش أد كده السنين اللي فاتت بس محمد سامي قطع الطريق عليها وقال: “ربنا يوفقها في حالها ويكتبلها الخير ولا هنشتغل ولا نلتقي ولا حاجة، طيب ولما نشتغل مع بعض أنا هستفيد إيه إحنا كان بيننا خلافات سابقة والخلافات زي ما هي لحد دلوقتي منتهتش، وأنا مليش علاقة بيها والواحد بيمشي لقدام عشان ينجح مش بيرجع لورا والناس اللي بتدور على اللي ورا وتتكلم في الأمور دي هتضيع وقت ومجهود عالفاضي”.
موقف سامي من تصرف غادة عبدالرازق
وكان موقف محمد سامي من تعليق غادة عبدالرازق على بوست ليه كان كاتبه في وقت نجاح مسلسل “جعفر العمدة” في رمضان صادم بردوا وقال هي قالت في تعليق ليها “ونعمة بالله” وطبعًا كل نجاح بيرجع لربنا وردها جميل ومحترم على حاجة إيجابية عملناها للناس وهو ده الفن، وكلامي في البوست وقتها كتبته في لحظة وأنا قاعد وأهلي كانوا مبسوطين جدًا بنجاحي وأنا حلمت أكون مخرج ومؤلف وحققت حلمي الحمد لله وربنا كرمني”، وتقريبًا رد زي ده لما تشوفه غادة هتتصدم.
تصرف غادة عبدالرازق طلع على فاشوش
المهم إن غادة عبدالرازق كانت أثارت جدل الفترة اللي فاتت بخصوص خلافها مع محمد سامي، واتفاجئ الجمهور بتعليقها على صوره نشرها سامي على حسابه في “انستجرام”، وده اللي خلى الجمهور بسأل عن إمكانية حل خلافهم وإنهم هيشتغلوا مع بعض وناس قالت إنهم اتصالحوا بعد سنين من القطيعة بينهم وفي اللي قال دي غادة نفسها ترجع تشتغل مع سامي تاني وبترمي عربون محبة، لكن كل الأحلام دي اتبخرت بعد اللي قاله سامي عن شغلهم سوا تاني وخلافاتهم مع بعض.
خلاف سامي وغادة
وكلنا عارفين إن في خلافات كبيرة وقعت بين محمد سامي وغادة عبدالرازق سنة 2013 وهما بيصوروا مسلسل “حكاية حياة” وده بسبب تدخل غادة المستمر فيما صميم شغله ووقتها دبت خناقة لرب السما بين الاتنين قدام فريق العمل لدرجة إن غادة بعتت جوز بنتها روتانا الظابط عشان يتعدى على سامي بالضرب واتسبب في نقله للمستشفى وسامي اضطر يعمل محضر.
تدخل وسطاء
طبعًا الفترة اللي فاتت بنشوف نجوم بيشتغلوا مع بعض في مسلسل واحد ومش كل عمل بيشيله نجم لوحده زي زمان وده راجع لخطة إنتاجية جديدة بنشوفها بقالنا سنتين تلاتة ومش عارفين ممكن طريقة الإنتاج دي هي اللي تدوب الخلاف بين سامي وغادة الفترة الجاية ويتدخل وسطاء ولا إيه، يمكن الأمور ترجع أحلى واهو كله شغل، تفتكروا ممكن ده يحصل ونرجع نشوف الاتنين بيجمعهم عمل جديد ولا خلاص بقت بينهم مصانع الحداد؟، مستنيين تكتبولنا آرائكم في التعليقات.
