تحدث الفنان أحمد فهمي عن مسلسل سفاح الجيزة، وفكرة تغير جلده بعيدًا عن الكوميديا، قائلًا: «من زمان وأنا قايل لازم أكسر الكوميديا».
وتابع الفنان أحمد فهمي في تصريحات تلفزيونية له: «كان حظي حلو في العارف مع عز لكن مكنتش بطولة.. لحد ما جت الفرصة ولقيت طارق المنتج في المكتب بيقولي لو حابب تكسر الكوميديا بتحب دور إيه».
تصريحات أحمد فهمي
وأضاف: «قلت له بحب الممثل اللي مش مثالي اللي مش بيقوم يبوس إيد مامته وكده، فطلع حلقة قرأتها في نص ساعة وخرجت قولتله تمام يلا.. واتفقنا وأنا أصلا كنت متابع القضية.. وحضرنا لمسلسل سفاح الجيزة على مدار عامين والمخرج هادي الباجوري في بروفات الترابيزة قالي عاوزك تشتغل براحتك».
واستكمل الفنان أحمد فهمي بطل مسلسل سفاح الجيزة، حديثه: «بدأنا نتكلم على كل التفاصيل منها الصوت والابتسامة، وهادي الباجوري قالي أنت بتحب أي نوع في الأبطال قولتله بحب البطل اللي مش مثالي ومن هنا جاء مسلسل سفاح الجيزة وكان نفسي أنجح في السفاح بعد نجاح فيلمي مستر إكس».
وقال الفنان أيضًا: «ودا حصل بفضل مجهود ناس كتير وكل واحد اجتهد واشتغل على المشروع صح.. والمخرج هادي الباجوري السبب في اختيار نبرة صوتي وساعدني في اختيار الشخصية».
وتابع حديثه عن كواليس العمل، قائلًا: «طبخت كويس في المسلسل وتخنت من كتر الأكل والمخرج قالي أنا عايز وشك يخس بس كرشك يكبر شوية.. والصعب إنك تحافظ على الشخصية طول الوقت بنفس نبرة الصوت لأنه مش صوتي الأصلي».
وعن ردود الأفعال حول مسلسل سفاح الجيزة، علق قائلًا: «كل يوم بكلم هادي الباجوري وأقوله مكناش متوقعين النجاح دا كله لسفاح الجيزة.. والمسلسل راح في حتة تانية».
مسلسل سفاح الجيزة
كما تحدث الفنان أحمد فهمي عن الكوميديا، قائلًا: «واخدة سمعة في مصر أنها أسهل أنواع التمثيل ودا مش صح».
بينما علق المخرج هادي الباجوري مخرج مسلسل سفاح الجيزة، قائلًا: «قبل ما نبدأ تصوير المسلسل غيرنا حوالي آخر 4 حلقات مكتوبين».
