المرة هذه اختار العروسة من خارج شمال أفريقيا كلها وأيضا من خارج مصر.. بعد ما كان تامر حسني اسمه مرتبط ببنات المغرب وتونس والشمال الأفريقي هذه المره خالف كل التوقعات واختار واحدة مختلفة تماما الناس تقول عليها عروسته الجديدة.
إحنا بقى عملنالكم الفيديو ده عشان نقولكم على مفاجآت عن عروسة تامر حسني الجديدة وإزاي خدته بالأحضان ووصفته بإيه وإيه شغلانتها؟ كل دي أسرار وحكايات هتعرفوها معايا وانتوا بتتابعوا الفيديو ده.
العروسة المرة دي هي اللي بتحبه أوي وواقعة في دباديبه لدرجة إنها متقدرش تستغنى عنه.. وطبعاً الناس مستنية تامر حسني يرتبط من تاني بعد ما انفصل خلاص عن مراته وأم عياله بسمة بوسيل.. ورغم إن اسمه ارتبط بملكة جمال مصرية وبعدين بنات من شمال أفريقيا بس المرة دي غير المرة دي واقع واقف.
الانفصال وحكاياته
كلنا عارفين قصة انفصال تامر حسني وبسمة بوسيل وزي ما هي بتعمل حركات ستات وتغيظه وراحت تحضر فرح ميرنا نور الدين وترقص وتغني هو كمان عاش حياته وظهر مع معجبات في الطيارة واسمه كان راكب التريند أكتر منها وكمان خلص الفيلم بتاعه ونزل بيه السينمات وحقق نجاح كبير جداً.. لكن عاوزين خطوة رسمية بقى للارتباط ولا كل واحد هيقعد يعمل حركات في التاني كده؟.. المهم مع الوقت الدنيا هديت بين الاتنين بس تامر حسني شكله راجع بتقله وهيفاجئ الكل بعد ما ظهر في أحضان واحدة جديدة خالص على الجمهور ويمكن ناس كتير متعرفش مين دي بس هي غير كل اللي عرفهم قبل كده.
السر في فيديو بينهم
في فيديو انتشر لتامر حسني ومعاه بنت لسه شابة كانت لابسة فستان قصير ودخل عليها تامر حسني وعمل حركته الشهيرة دي بالإيد وكأنهم مستنيين اللحظة وراحوا واخدين بعض بالأحضان.. بس البنوتة دي بقى كانت مبسوطة جداً وحضنت تامر أكتر وكان باين عليها إنها بتحبه لدرجة إن دموع الفرحة كانت هتقع منها.. طبعاً الناس عمالة تسأل مين دي وإيه حكايتها وشكلها كده العروسة الجديدة.
مين دي؟
اللي حضنت تامر حسني أو العروسة الجديدة زي ما الناس بتقول دي اسمها سارا الشامي وتبقى لبنانية الجنسية يعني يا سيدي يا سيدي ع الفتوش والتبولة وتامر بيعشق حاجة اسمها لبنان أصلا.. وعرفنا إن عندها مليون ونص متابع على حساباتها في إنستجرام وتيك توك وهي شغالة تيك توكر وبيوتي فاشون والمحتوى بتاعها خاص بالطبخ والأزياء ومفيش مانع تشتغل في الإعلانات ويكون معاها شغل في عروض الأزياء وغيرها من الأماكن اللي بتطلب حد يعلن ليها عن منتج.
أسرار في حياة العروسة
سارا الشامي بتعتبر تامر حسني هو الأيدول بتاعها ونشرت صورة وهي بنفس الفستان القصير مع تامر حسني على حسابها في إنستجرام وقالت عليه كده في تعليقها على الصورة.. طبعاً هنكمل الأسرار إن سارا الشامي بدأت شغل على تيك توك سنة 2020 وقت الأزمة العالمية.
وبدأت تعمل فيديوهات طبخ وكانت بسيطة ولا بتتعامل بالشوكة والسكينة ولا الكلام ده وحتى ممكن تاكل بصوابعها العشرة عادي وعشان كده الناس حبتها وقربت منها وبقى المتابعين بالملايين وبتقول إنها قدرت تحقق شهرة كبيرة كمان في تقليد اللهجات الخليجية وده عشان عاشت 5 سنين في الخليج وتقدر تقلد السعودية والمصرية والكويتية.
بعد المعلومات اللي بتعرفوها لأول مرة دي بقى.. تفتكروا سارا الشامي هتبقى عروسة تامر حسني الجديدة فعلاً وهيتحوزها قريب ولا الموضوع ليه حسابات تانية؟ اكتبولنا آرائكم في التعليقات.
