من بداية موسم رمضان ويوجد موجة عالية من الانتقادات لنجمات وبطلات المسلسلات وصلت لحد التنمر والترصد والإهانات.. وطبعا أول واحدة أخذت من كل هذا نصيب كانت الفنانة منى زكي.. من قبل حتى عرض مسلسلها وغيرها كثير من النجوم.
كل الفنانين بيشتكوا السنة دي من انتقادات المسلسلات والأدوار على السوشيال ميديا.. وإنهم زهقوا من حالة التنمر والإهانات اللي بتتوجه لهم ولزمايلهم عمال على بطال
وعملوا مع بعض زي جبهة للدفاع عن نفسهم وأصحابهم.. أو لو حتى مش صحابهم.. طالما فنان وممثل يبقى تبعنا وواجبنا نحميه من الأشرار بتوع السوشيال ميديا والتعليقات السلبية
من قبل رمضان وطبعا منى زكي كانت أول واحدة خدوها غسيل ومكوى على السوشيال ميديا.. اللي يتريق على صورها في بوستر مسلسل “تحت الوصاية”.. واللي يقولك ايه الحواجب دي.. وليه مطلعين الستات اللي شغالين مبهدلين كده .. وغيره وغيره من التعليقات الغريبة.. ورغم إنها كانت ساكتة كل الفترة دي بس زمايلها كانوا بيدافعوا عنها باستماتة.. وكانوا شايفين إن انتوا مجانين دي منى زكي يعني
وفعلا لما المسلسل نزل وطلع حاجة فوق العظمة.. والشكل واللبس كانوا فعلا ضروريين ولايقين على القصة.. هنا ردت منى زكي وقالت إن السوشيال ميديا بقت حاجة صعبة جدا بس هي مش مركزة معاها اصلا
خلصنا من الهجوم على منى زكي وبقت حبيبة الكل دلوقتي.. لقينا الناس ماسكة مربوحة “رحمة أحمد” بطلة مسلسل الكبير أوي غسيل ومكوى برضه.. وبيتريقوا على كل حاجة بتعملها في الموسم السابع من العمل
الكبير أوي اللي كان مسيطر السنة اللي فاتت.. فقد كتير من جماهيريته ومتابعينه السنة دي.. خصوصا مع نجاح مسلسل جعفر العمدة الكبير.. وإنه بيتعرض في نفس الوقت
بس في الأول خالص خدت مربوحة انتقادات كتير.. هي بتزعق كده ليه؟.. صوتها مزعج أوي.. خلاص زهقنا من طريقتها.. وغيره من الكلام اللي بقى بيتقال عنه تنمر إلكتروني
وفي الوقت اللي مربوحة ولا ردت ولا ركزت ودايما كانت بتهزر فيه على أكونتاتها عادي جدا.. زمايلها دافعوا عنها.. وبقت تظهر في عزومات وقعدات فنانين ولا كانوا يعرفوها ولا بيكلموها قبل كده.. بس دلوقتي هي ممثلة وكوميديانة ومن واجبهم إنهم يقفوا في ضهرها.. ده حتى عمرو وهبة قالها أنا عارف إنك قاعدة بتعملي محشي ولا بيهمك أساسا.. ودي يا جماعة أحسن طريقة لتجاهل الانتقادات.. أعملوا محشي:D
أما بقى الزغلول الكبير وهي وداد بطلة مسلسل جعفر العمدة.. الممثلة جوري بكر اللي بقت حديث الساعة.. وخدت رسميا لقب جربوءة رمضان.. وزي ما اتقال عليها إنها شبه ماري منيب.. اتقال عليها برضه كلام مش ولابد الصراحة
وداد من كتر ما الناس متوحدة مع المسلسل ومتابعينه وواخدين الأحداث على صدرهم شوية.. بقوا معتبرينها عدوتهم بجد.. وبيشتموها ويغلطوا فيها في الكومنتات والرسايل.. لدرجة إنه اضطرت تطلع تقول ارحموني شوية.. أنا أهلى وجوزي وصحابي زعلانين من اللي بتقولوه عليا
وغيرهم وغيرهم من الفنانين والفنانات اللي كانوا أو مكنوش موفقين في اختيارات أعمالهم الرمضانية.. وممكن نتكلم عنهم في فيديو تاني.. استنونا.
