اتسحب في نداهة الفن وعلىٰ صوته بالغناء، تخطى عمر الستين ولا توجد في حياته امرأة، هذه هي حياة الكينج محمد منير تلك الحياة المليئة بالكواليس والأسرار والتي ينتحدث عنها في التقرير التالي:
ليه الكينج هرب من نجلاء بدر يوم فرحهم وحطها في موقف محرج؟ وليه انفصل عن بنت عمه بعد أقل من شهرين من جوازهم؟.. وليه أصلا محمد منير مش بيعمر مع الستات؟ وإيه حكاية الجوزاة العرفي من فنانة شهيرة؟.. يلا بينا نعرف مع بعض كل حاجة.
محمد منير خطب نجلاء بدر وغنالها لما النسيم واختفى ليلة كتب كتابه عليها وقفل تليفونه وهي اتعرضت لصدمة.. وفي جوازة تمت من حب عمره بس قعد معاها 50 يوم بس وانفصل عنها وعنده 18 حفيد وغنى في عزا مامته ومش بيعرف يطلع إبداعه في الغنا غير بعد ما يشرب سجاير وبيدور على بنت الحلال وليه شرط وحيد فيها عشان يتجوزها.. كل دي أحداث حصلت في الحياة الشخصية لمحمد منير.
أخوه تبنى موهبته
في يوم من الأيام اتولد طفل اسمه محمد منير في حواري أسوان أسمر ونخيل وشعره مفلفل شبه بكار.. قدر يكون شاهد على بناء السد العالي أعظم إنجاز حصل في التاريخ وقتها بس ده اتسبب في غرق قريتهم بعد ارتفاع منسوب المياه فاضطرت أسرته ترحل على القاهرة.
وعشان منير طلع على حب المزيكا فضل يتابع الحركة الموسيقية بس دراسته كانت في كلية الفنون التطبيقية حاجة ملهاش علاقة خالص باللي هو بيحبه وبيعمله دلوقتي.. وعشان كده أخوه فاروق منير اتبنى موهبته واتعرف على شعراء زي فؤاد حداد وعبدالرحيم منصور والمطرب أحمد منير ومن هنا علىٰ منير صوته بالغنا واتعلم يغني نوبي شرقي مش أفريقي.. وانضم للفرقة بعدها هاني شنودة ويحيى خليل واتطورت أغنية منير وبقت ميكس بين الشرقي والغربي والنوبي.
ليه مش بيعمر مع الستات
محمد منير بيقول إن حركة إيده بالصوابع اللي بيعملها على المسرح دي ملهاش معنى بس هو شخص خجول وانطوائي جداً ويمكن ده اللي خلاه يتوتر من الجمهور وعشان يخفي التوتر ده كان بيعمل الحركة دي بس بعدها ومع الثقة بالنفس بقى يحط إيده في وسطه واتقال إن الخجل والانطواء دول هما السبب ورا إنه مش بيعمر مع الستات ومقدرش لحد دلوقتي يكّون أسرة.
ستات في حياة منير
أول جوازة للكينج محمد منير كانت من داليا يوسف ودي تبقى بلدياته وبنت حتته ونوبية زيه بس جوازهم استمر 55 يوم بس وانفصلوا وبعدها داليا شافت حياتها وهاجرت على بلاد بره ومش عايشة في مصر.. وفضل منير فاكر حب عمره لحد ما قابل نجلاء بدر اللي اتصدمت فيه صدمة عمرها وكانت وقتها لسه بنت جميلة صغيرة متخرجة من كلية الإعلام شافها اتسحر بيها وغنالها (لما النسيم بيعدي بين شعرك حبيبتي بسمعه).
وقالها الأغنية دي ليكي وبدأت قصة ارتباطهم وطلبها رسمي للجواز وقبل كتب كتابهم بيوم هرب وقفل تليفونه ومحدش عرف يوصل ليه كإنه فص ملح وداب.. وده اللي خلاها اتحطت في موقف محرج وبعد كام يوم اتصل بيها وقالها كل شيء قسمة ونصيب واعتذر عن الإحراج اللي حصلها.. وقتها كان هو عنده 44 سنة وهي عندها 24 سنة.
ومن وقتها عاش منير للفن وكسر حاجز الستين وعنده 18 حفيد وحفيدة من ولاد اخواته بيصرف عليهم كلهم وبعتهم يدرسوا في جامعات كندا وحلم إن يكون عنده ولد من صلبه اتبخر ومحصلش إنه اتجوز رسمي وخلف دي خالص رغم إن لسه الأماني ممكنة.
يدور على شريكة حياته
منير بعد حوار نجلاء بدر بكام سنة بدأ يحنْ لذكرياته القديمة وافتكر حب عمره وراح يدور عليها في بلاد بره لحد ما لقاها وقاله (مفيناش حاوريني يا كيكا مفيناش لف ودوران مبقاش في وقت يا روحي للشكوى وللهجران) وهوب عرض عليها الجواز ووافقت وبعد 60 يوم انفصلوا والكلام ده كان سنة 2014 وداليا يوسف رجعت تاني على أوروبا ومتكلمتش في أي حاجة والناس بدأت تقول ده ملوش في الجواز بس منير قال فشر ده أنا قادر اتجوز واخلف من بكرة لو عاوز وأنا أصلا بدور على شريكة حياتي وعاوزها شيك وأنيقة ومثقفة ومعاها لغة وتحترمني وتحترم اختلافي.
حكاية الجوزاة العرفي
طبعاً منير حصله مواقف في حياته أثرت فيه زي إنه اتعرض عليه يتجوز الفنانة فايزة كمال ولما محصلش نصيب لهفها المخرج مراد منير اللي كان صاحبه وقتها وده أول تأثير حصله.. كمان مامة منير رحلت بدري وهو لسه صغير وبسبب تأثره بيها ساب العزا ودخل الحمام يغني ويدندن وبعدين قال لنفسه إيه اللي أنا بعمله ده.. ومن فترة ارتبط اسم محمد منير بجوازة عرفي من ممثلة شابة اسمها مي حسن وانتشرت وثيقة جواز لكم منير نفى القصة دي خالص وقال إيه اللي بتقوله ده أنا تعبان ولسه راجع من رحلة علاج بره.
تفتكروا محمد منير هيلاقي الونس والدفا اللي بيحتاجه من الجواز ويشوف بنت الحلال ولا الجميل الأسمر اللي وصل السبعين مش هيتجوز خالص؟ اكتبولنا آرائكم في التعليقات.
