روت الفنانة منى زكي، كواليس مسلسل “آسيا” الذي قام بإنتاجه زوجها الفنان أحمد حلمي.
وقالت منى زكي، عن هذه الفترة: ” أحمد حلمي كان منتج مسلسل آسيا ودي المرة اللي قررنا إننا منشتغلش سوا هو منتج وأنا ممثلة”.
وتابعت: “دا كان صعب أحيانا هو ملوش ذنب وبيحاول يلحق حاجات وأنا عاوزة حاجة معينة، الموضوع كان سخيف واتخانقنا، مش خناق شخصي بس إحساس أن هنعدي المرحلة دي ومش هنعمل كده تاني ومش هنكررها”.
وخلال اللقاء تحدثت منى زكي عن أهمية قيامها بدور في خدمة المجتمع، اعتمادا على الشهرة التي وصلت لها بسبب موهبتها.
وقالت: “موضوع إني أساعد المجتمع اتعلمته في شغلي وحاسة إنه صح وبحاول طول الوقت أعمله، إذا كان من خلال شغلي أو بشكل شخصي”.
وأضافت: “بحس إن ربنا ممكن يكون إداني ملكة الموهبة مش بس علشان أكون مشهورة، لإن الشهرة أغلس حاجة في شغلتنا، لكن علشان لو في ناس بتحبني أو شايفة إني بفكر صح لما تشوفني بعمل توعية عن إيه أو حابة أساعد في إيه ممكن ده يشجعهم، وهو نوع من رد الجميل للمجتمع”.
كما تطرقت خلال حديثها عن أهمية الحفاظ على التوازن في طريقة تعامل الآباء والأمهات مع الأطفال، ومعرفة المعنى الحقيقي لمصطلح التربية الإيجابية قائلة: “أنا من قريب اتعلمت، كنت صارمة أوي مع بنتي أكثر من الصبيان، لأنها كانت أول بنت ليا وكنت صغيرة في السن، ومتخيلة إن الصح صح وكل حاجة بنظام وفي عقاب وكنت سخيفة، وبعتذر لها طول الوقت على سخافتي”.
وأوضحت منى زكي رأيها في مصطلح التربية الإيجابية قائلة: “ناس كتير بتفهمه غلط، إن معناه الولد يبجح في أهله ويبقى زيه زيهم، التربية الإيجابية هي إنك تديه ثقة في نفسه، ويبقى عارف إزاي يتعامل مع الناس، وتكبري الحاجة الكويسة جواه، مش تدلعيه”.
