اعتدنا في اي مناسبة أن نحتار في التفكير فيث شراء الهدية المناسبة، وعادة تذهب أفكارنا لشراء الذهب لأن قيمته ترتفع مع مرور الوقت، ولكن ما قصة صابونة محمد رمضان الذهب وما هو سعرها، فما هي اغرب الأشياء المصنوعة من الذهب وقد لا نعلم بوجودها؟ هذا ما نتعرف عليه خلال التقرير التالي:
من بعد فيديو محمد رمضان اللى إنتشر على كل مواقع السوشيال ميديا وحقيقى إستفز ناس كتير رغم إنها مش أول مرة يعملها،إيه بقى الحاجات الغريبة دى اللى مصنوعة من الدهب ؟
حاجة أغلبنا بناكلها أيشى بالطماطم إيشى بالبطيخ ،وفى ناس عندها فوبيا منها ،ولكن مش بتاعتنا دى ،جبنة الدهب والشريحة الواحدة ال100 جرام ب 429.5 دولار وبلاش أقولك بالمصرى بكام
تخيل بقى الدوا اللى تاخده يبقى كبسولات من الدهب، والنبى لو فيها الشفا ممكن تخاف تخدها ، تخيل بقى ياخدها وأمر الله ينفد ويموت ، سعر الكبسولة 425 دولار يعنى حوالى كده 8.363.58ج مصرى.
ماهو خلى بالك لما يموت هيتحط فى تابوت من الدهب بردوا.
وبما إننا إتكلمنا عن الأكل المصنوع من الدهب مش هننسى بوديج الشكولاتة الدهبى، اللى هو أصلا إحنا عارفين الشوكولاتة بالصدفة هتقولى بودنج شوكولاتة ؟ حقيقى إن مش كله من الدهب هم بس بيحطوا كجارنيش كده عليه شوية دهب زى التورتة عندنا كده لما نعملها ديكوريشن لونه دهبى مفرقتش يعنى ؟
حد هيقولى كله أكل أكل مفيش حاجة تتشرب ؟ الحقيقة الشركات منسيوش دى ياترى حد يجيب فى سيرته ويزور فيشرب مية عادية كده؟ لا طبعا عاملوا عصير لمون معلب متضاف عليه نسبة من رقائق الدهب عيار 24.
حطوا شوية دهب على اللحوم علشان لما يشوها على الشواية المصنوعة بالكامل من الدهب تبقى قد المقام اللى سعرها 155ألف دولار يعنى تعملها كده حسبة ج 3.047.253.50
دخول الحمام مش زى خروجه فعلا .. هتدخل متعكنن تطلع مفرفش ماهو حمام مصنوع من الدهب سيبك من الوزة اللى بين السيراميك فى حمامك ،حمام بالكامل من الدهب عيار 18 سنة 2016 ، ولكن حقيقى مفيش سعر دقيق عن تكلفته إيه، أنتو أكيد متخيلين ممكن يبقى بكام .
حتى مناديل التويلت الورق العادى مش هيكون مناسب لفئة بتاكل جبنة من الدهب فعملوا المناديل من دهب عيار 24.
رايحة فين ؟ رايحة أعمل ماسك أصلى بشرتى متبهدلة الفترة دى ؟ ماسك الدهب اللى بيشد البشرة ويحفز الكولاجين؟ عملوه بس من الدهب الخالص.
ده مولود وفى بقه معلقة دهب ، أقصد تتينة دهب ، ماهو مش هيبقى حمامه دهب وأكله دهب ويسكت إبنه بحاجة سيلكون. عرفتوا ليه ولادكوا بيزنوا ومبيسكوتوش ؟
بتدفع إشتراك الجيم ومش بتروح؟ هو أنا لازم أروح ؟ لا طبعا الدمبلز الدهب هتغنيك عن الجيم ،واللى تمنها 125 ألف دولار .
باقى العربية، ماهو مش هيركب لامبورجينى لا لازم بالدهب لاحسن الناس يقولوا عليه بخيل ، سعر العربية إضافة دهب بحوالى 7.5 مليون دولار.
هل هيجى اليوم اللى تبقى قاعد فى كافيه وتقوله أكتسرا دهب لو سمحت؟ده حصل لما شاب إسمه محمود بدرى أثار الجدل إنه بيشرب كابتشينو بالدهب سعره حوالى 35 ألف جنية؟
