ما رأيك رايك إن السعودية تشتغل وتعمل عمرة وتحج كمان ؟ طبعا محدش فينا مش بيتمنى أحسن من كدة، طيب ده ممكن يحصل إزاي ؟
أيوة يا سيدي ده موجود ومن زمان كمان وده لأن السعودية بتطلب كل سنة عمالة لخدمة الحجاج ودلوقتي بقى سهل جدا إنك تسافر وتكون ضمن العمالة دي، بس لازم تعرف إيه الشروط المطلوبة عشان تعدي في كل الاختبارات.
موسم العمرة بدأ خلاص وعشان كدة في الفترة دي شباب كتير بيكون نفسه يسافر ويشتغل ضمن العمالة اللي بتطلبها السعودية للعمل بـ المسجد الحرام، والمسجد النبوي خاصة خلال موسم العمرة والحج السنة دي.
وحسب تصريحات حمدي إمام، رئيس جمعية رجال الأعمال أصحاب ومديري شركات التوظيف المصرية، قال إن المهن اللي بتسافر لـ المملكة العربية السعودية بتكون “سائقين وجزارين ومساعدين جزارين وحلاقين، وعمال مطارات، وعمال فنادق ومطاعم وشيف طعام، ومهن تانيه خدمية”.
كمان أكد إن شركات إلحاق العمالة فتحت باب التقديم من شهر رجب اللي فات، لكن المفترض إنه يبدأ سفر هذه العمالة بداية شهر رمضان المقبل، خاصة السائقين، وده لأنه سفر السائقين بيكون خلال شهر رمضان من كل عام، وعادة هي أول فئة بتسافر وآخر ناس بترجع”.
وخلي بالك اول سنة تستقبل السعودية العمالة الموسمية المصرية للحج بعد انقطاع دام سنتين بسبب الظروف الصحية في 2020، لأن ساعتها السعودية وقفت موسم الحج.
وعشان كدة بدء موسم جديد لسفر العمالة المصرية للعمل والمشاركة في تنظيم الحج السنة دي، هيحط كل الشركات العاملة في المجال ده قدام مسؤولية كبيرة عشان يقدروا يخرجوا بموسم مميز تشارك فيه العمالة المصرية بكل جهودها لخدمة حجاج بيت الله الحرام على أكمل وجه.
أما بخصوص رواتب العمالة خلال موسم الحج، ف أكد إنها بتبدأ من 1250 ريال شهريا لعمال المجازر والمساعدين والمطارات و3500 ريال شهريا للسائقين مع الإقامة، عدد عمالة الحج بيكون عددها حوالي 30 ألف عامل أما السواقين فـ ليهم نصيب الأسد وده لأنهم بيكونوا 23 ألف سائق.
أما بقى الأوراق المطلوبة فهي عبارة جواز سفر ساري لمدة متقلش عن سنة، وفيش وتشبيه، وفحص طبي فيروسات، من المعامل المركزية التابعة لوزارة الصحة والسكان بقيمة 500 جنيه للشخص الواحد.
وعندنا في مصر حوالي 50 شركة من شركات إلحاق العمالة بالخارج بتشارك في سفر العمالة الموسمية للعمل بموسم الحج من إجمالي 1300 شركة لإلحاق العمالة.
ولو انت متعرفش فـ وزارة القوى العاملة كانت اتفقت مع وفد من القنصلية العامة السعودية بالقاهرة برئاسة القنصل العام سلطان السبيعي، وفيصل العتيبي الملحق العمالي السعودي، وممثلين عن شركات إلحاق عمالة مصرية إلى الخارج، على تنظيم إجراءات سفر العمالة المصرية الموسمية لـ السعودية للعمل في موسم الحج والعمرة خلال العام 2023.
واتفقت الوزارة على مستويات الأجور، وزيادة في المنح والبدلات والحوافز التشجيعية.كمان بدأت القنصلية المصرية في جدة والسفارة السعودية في القاهرة، في تسجيل الشركات لتأشيرات السفر الخاصة بالعمالة اللي هيتم اختيارها بعد اجتياز اختبارات اللجنة المشتركة بين الجانبين المصري والسعودي.
ودلوقت بقى يهمنا رأيكم: هل عرفتو حد سافر ضمن العمالة المصرية اللي بتروح السعودية لخدمة الحجاج، و إيه رأيكم في المرتبات المعلنة بالنسبة للوظايف والمهن المطلوبة؟
