عاشت اكثر من 50 سنة فى الكويت، قضيت حياتها كلها عايشة فى الكويت وسط الكويتيين كإنها واحدة منهم . معروفة ومشهورة من بداية دخولها الكويت ولحد النهاردة بالمصرية أقدم صيدلانية بالكويت.. ولهجتها ما زالت مصرية 100%
مين الصيدلانية دى ؟ ومكانها فين فى الكويت؟ وليه الناس كلها بتحبها كده؟ وايه اللى خلاها تكمل لمدة 50 سنة فى الكويت فى حين ناس كتير بتترحل أو بترجع مصر ومش بيستحملوا الغربة .. مش هتصدق اللى قالته عن الكويتين..
فى الوقت اللى كتير من المصريين فى الكويت ناقمين على النعمة اللى هم فيها ومش عاجبهم بعض القرارات اللى بتصدر لهم وأكيد فى مصلحتهم قبل ما تكون فى مصلحة الدولة فى نماذج نقدر ناخد منها دروس وعبر كافحت واتغربت وعاشت أكتر من نص عمرها فى الكويت مبسوطة ومرتاحة ومحبوبة من الكبير والصغير وهى كمان أكيد حبتهم وإلا مكانتش عاشت أكتر من 50 سنة فى الكويت وأكتر من اللى عاشته فى مصر ..ودى الصيدلانية ألفت موافى .. الشهيرة فى الكويت بأقدم صيدلانية مصرية .. صيتها مسمع ومفيش حد ميعرفهاش ،وكل اللى فى الكويت سواء مصريين أو كويتين أكيد اتعاملوا معاها فى كل الصيدليات اللى كانت بتشتغل فيها من بداية دخولها الكويت ..
الناس اتفاجئت بظهورها فى فيديو مع مواطن كويتى بيسألها بعض الأسئلة .. بيقولها بيقولوا عنك إنك أقدم صيدلانية فى الكويت فردت وهى بشوشة وبتضحك وقالت له أيوة ايوة انا فعلا أقدم صيدلانية فى الكويت ودخلت الكويت سنة 1970.. يعنى بقالها حوالى 54 سنة!
الكويتى ده صور معاها الفيديو فى الصيدلية وكانت لابسة البالطو الأبيض فسألها إيه الفرق بينك كصيدلانية وبين الدكتورة فى المستشفى .. قالت له أنا دورى بس أصرف الدوا اللى الدكتور وصفه أما الدكتورة فى المستشفى هى اللى توصف الدواء وتكشف على المرضى وتعمل العمليات ودى مش شغلتى ..
هى كبيرة فى السن جدا وكانت واقفة بصعوبة بتتكلم معاه ولكن صحتها كويسة ويتتكلم كويس جدا وكل ما تمشي يوقفها ويسألها بعض الأسئلة وقالها ليه داء السكر والضغط منتشر كتير فى الكويت؟
ردت بكل عفوية وقالت له مبيعملوش رياضة ومش بيمشوا كتير ،وعلى طول يركبوا عربيات فى مشاوريهم وكمان نوعية الأكل اللى بياكلوه ..
ولما سألها وقالها صحيح الزعفران بيقوى الذاكرة لإن داء النسيان بردوا منتشر فى الكويت .. قالت له فعلا الزعفران بيقوى الذاكرة ووصفت له وصفة طبيعية زى زمان معتمدتش على الأدوية بس.
سؤال أخير وجه له وقالها ايه فايدة فيتامين ب 12 قالت بيقوى أعصاب الجسم كله والذكراة كمان
رد عليها الكويتى وقالها بعلو صوته فى النهاية تحيا مصر والكويت ابتسمت وقالت له الله يخيلك ومشيت علشان تكمل شغلها لكن هو قالها ربنا يديكى الصحة وطولة العمر ولما سألها إسمك الكريم إيه قالت له أم احمد!
قالها إنتى من بيت موافى صح؟ أصل كان فى واحد اسمه موافى مستشار فى وزارة المالية .. قالته مظبوط!
وعلى حسب تعليقات الجمهور اللى كلهم شكروا فيها وفى معاملتها وذوقها وأحترامها لهم إن الصيدلانية أم احمد أو ألفت موافى موجودة بصيدلية البراحة شارع قطر السالمية وفى اللى قالى فى صيدلية غرناطة بجوار مجمع المثنى شارع فهد السالم..
الكل اتفاجئ من طريقة كلامها اللى كلها باللهجة المصرية ومفيش ولا كلمة قالتها بالكويتى رغم إنها عاشت كتير هناك ورغم كده حافظت على لهجتها المصرية وفى نفس الوقت فخورة بإقامتها فى الكويت ومعاملة الكويتين لها وإلا مكانتش كملت حياتها فى الكويت..
إنتوا بقى هل تعاملتوا معاها قبل كده طول فترة إقامتكوا فى الكويت ؟ وهل ممكن تكمل المدة دى كلها زيها كده فى الكويت ولا محدد مدة معينة وبعدها هترجع مصر؟ شاركونا فى التعليقات
