فاكرة نفسها شاكيرا وتنشر فيديوها بوس وأحضان مع زوجها على السوشال ميديا وهي حامل.. ملابسها جريئة ولا يفرق معها كلام الناس والبنطلون الشفاف اللي كشف مكان الجنين جاب آخر الجمهور معاها.. هي دي حياة دينا داش.
ياترى ليه بتعمل كده؟ وليه مش هاممها الجمهور وانتقاداته؟ وليه بتقول حاجة وبتعمل عكسها ويا ترى وقفت شغل شركتها عشان تخلي بالها من الحمل والبيبي؟ وبتقضي وقت الحمل إزاي بقى؟ أصل فيديوهاتها كلها جرأة وبطنها قدامها وبترقص مع جوزها والحياة إيزي خالص.. يلا بينا في الفيديو ده أقولكم الحكاية.
دينا داش قالبة السوشال ميديا من وقت ما أعلنت حملها لحد دلوقتي والجمهور شايف تفاعلها وهي حامل بعد سنتين من جوازها مقضياها وشكلها كده مش هتجيبها لبر وشايفة نفسها شاكيرا وبتعمل كل حاجة ممكن تتخيلوها لدرجة إن الجمهور بقى قرفان منها ومعظم الوقت انتقادات بسبب لبسها الجريء المكشوف اللي مبين جسمها.. طبعًا كل ده وهي ولا هنا بتعمل اللي على مزاجها وبس وهي من يومها وهي كده حتى كتبت كتابها وفرحها قلبت بيه السوشال ميديا والناس هاجمتها وهي قاطعة ودانها ومش سامعة لحد.
كل حاجة وعكسها
دينا داش كانت مهتمة تنزل بوستات عن شغلها ومهتمة أوي بكل تفاصيل حياتها العملية قبل الجواز وبعدها لدرجة إنها وسّعت في شغل شركتها وبتكتب كل حاجة وبتدعم البنات اللي في سنها عشان الاستقلالية والكلام ده.. لكن حسابها على إنستجرام دلوقتي اتحول لاستعراضات حملها وبس لدرجة إنها الناس استغربت وقعدت تسأل هي وقفت الشغل في شركتها وقررت تهتم بالحمل والبيبي اللي جاي ولا إيه الموضوع؟
وهنا بقى اتقال دي بتقول حاجة وتعمل عكسها والجواز والحمل غيروها خالص واتحولت من بلوجر وبقت ستْ بيت.. واللي عرفناه بقى إنها موقفتش شغلها ولا حاجة هي كل حاجة زي ما هي في الشركة بس مهمتها دلوقتي الإشراف وبس ومهتمة بالحمل والبيبي فعلًا.
بتقلد الغرب
دينا داش عمالة تنزل صور حملها وبترقص وبتستعرض بطنها المكشوف معظم الوقت لدرجة إن الناس قالت دي بتقلد الغرب وقاصدة تعمل كده وبقت في مقارنة بينها وبين الفنانة العالمية شاكيرا اللي كانت بتعمل كده بردوا وهي حامل.. طبعًا دينا داش متميزة بإطلالاتها الأنيقة والمميزة اللي بتعمل جدل وده بسبب أنوثتها وأناقتها واختيارها ملابس وفساتين بتبين جمالها وقوامها المتناسق ورشاقتها.. بس المرة دي إطلالاتها بقت صادمة يعني بالمايوه مرة وببنطلون مكشوف كشف مكان الجنين عادي وكل حاجة كانت واضحة وكمان بتلبس فساتين قصيرة والحياة بالنسبة لها كده عادي.
روتين حياتها
دينا داش مكانش هاممها الجمهور وهو بينتقدها لما رقصت مع عريسها بفستان قصير قدام الجامع بعد ما كتبوا كتابهم وكإنها عملت سيشن هناك لدرجة إن الناس قالوا هي الأماكن المخصص لكده قصرت معاكي في حاجة وهي مردتش ووقت فرحها عملته وقت انتشار الأزمة العالمية ومحدش لابس كمامة والناس اتكلمت بردوا وهي مش هنا.. دلوقتي بقى روتينها اليومي بردوا مقضياه في الرقص مع جوزها وبتلبس كل اللي نفسها فيها وكإن الرقص بقى روتين حياتها.. كمان دينا بتعمل تمارين رياضية كتير في الجنينة بتاعة بيتها ودي طبعًا تمارين تخص الست الحامل وده بردوا تقليد للغرب عادي ومكملة.
