قد تعتقد أن وجود زجاجة تراب سعرها 500 جنيه في مصر هتفتكروني أمر غير حقيقي ويشبه الدعابة، ولكن المر حقيقي وموجود بالفعل، وقد تجدها على أحد مواقع التسوق الإلكتروني معروضة للبيع، فما قصة هذه الزجاجة وهل حقا يوجد عليها إقبال للشراء؟ هذا ما نتعرف عليه من خلال التقرير التالي
هقولك يا سيدي الموقع الإلكتروني ده يعتبر متجر ومعرض فني مقره في جاردن سيتي، وعمل الزجاجة دي مستهدف بيها السياح الأجانب وده لأن القائمين على الموقع بيعتقدوا بأن تاريخنا الفرعوني ليس فقط هو الذي يجسد روح مصر، لأ ده كمان التفاصيل العملية للحياة المعاصرة في القاهرة أصبحت موطنًا لجميع الثقافات الفرعية على طول سنوات.
الموقع كمان شاف إن السياح بيجوا لمصر مستهدفين العاصمة القاهرة باعتبارها رمز تاريخي كبير، وعشان كده قرروا يعملوا الزجاجة دي تكون زي علامة تجارية للمدينة دول كمان بيستهدفوا يكون ليهم خطوط إنتاج بمنتجات شبيها بالأزازة دي أشياء من حياتنا اليومية لتعزيز الهوية المصرية الحقيقية.
طب إيه فكرة الإزازة والتراب؟
من وجهة نظر القائمين على الموقع إن القاهرة مدينة متربة، فعمر التراب يقرب من عمر المدينة ويحتوى على بقية كل ما نستهلكه ومن مخلفات تبلغ عمرها آلاف السنين.
بس كدا؟، لا دول كمان شافوا إن التراب ده بعد مرور أزمنة هيكون آخر شيء باقي مننا، والدليل الوحيد لمعرفة تكوين حياتنا وأرضنا ومحتواها وما تمكنا من إنتاجه.
قالوا كمان إن تراب المدينة بيدور في حلقات عبر السنين ليعود إلينا من جديد محمل بتاريخ العصور السابقة، ليبقى جزء مننا، مما نتنفس، ونراه، وإن من الصعب معرفة آخر مكان عدى به التراب الذي نصادفه يومياً، مثلا هل كان على أحد كباري القاهرة، أو كان بالأمس على سطح منزل؟ وهل كان في أول المدينة أم في وسطها أم في آخرها؟ وأين هو الآن؟”.
وعشان يقنعونا بالموضوع قالوا إنهم قرروا حفظ تراب القاهرة وبذلك حفظ رفاة حياتنا وأيضاً أمواتنا.
وأنه مفييش تركيبة زي تراب القاهرة، ومفيش أكثر من التراب حولينا، وعشان كدا في كل زجاجة من زجاجات تراب القاهرة شيء مختلف بمعادلة ووصفة مختلفة، لكن هما هيحاولوا يحللوا ما قد تحتويه زجاجة تراب القاهرة فيما بعد.
طب وإيه هي مكونات زجاجة التراب؟
استعرض الموقع مكونات زجاجة التراب، واللي هتكون مكونة من: زلط، رمل شمال افريقيا، بقايا عضوية، بقايا أكل ومشروبات (كشري، قشر لب، شاي)، حشرات، أعقاب سجاير، مسحوق عظام، نباتات متحللة، ورق، جير، فضلات المواشي والحيوانات، شعر آدمي وحيواني، دهانات جافة، فخار، عيدان خشبية، غيار معدني، ثاني أكسيد الكبريت، قش، حصى، فلين، عيوبنا، عادتنا، تركيبتنا. صالحه لمدى الحياة صنعت في مصر.
وكل المحتويات دي بـ500 جنيه وبس يابلاش والله ! دلوقتي بعد ما التراب بقى ليه قيمة قولولنا كدا رأيكم في الموضوع؟
