خلال الساعات القليلة الماضية انتشر في الصحف الإيطالية قصه شاب مصرى قام بعمل بطولي أشادت به كل إيطاليا ، فماذا فعل هذا الشاب وما سر تسميته سوبر مان؟ تابعونا من خلال التقرير التالي لمعرفة التفاصيل:
مفيش سيرة تقريبا في إيطاليا خلال الساعات اللى فاتت غير على الشاب المصرى علاء الدين سليمان واللي لقب بين الشعب الايطالي بـ “سوبر مان”، ودا بعد الموقف البطولي اللي قدمه، وصحيح المصريين بخير ورجاله حتى في غربتهم، الشاب دا أنقذ فتاة قبل انتهاء حياتها بأعجوبة بعد تعرضها لحادث مروري أفقدها الوعي والسيارة كانت على وشك أنها تنفجر بيها بس هنا ظهر الشاب المصري الشجاع اليل كله شهامه ونخوه حتى في الغربة.
البطل علاء الدين سليمان، أحد أعضاء الجالية المصرية بإيطاليا، قال فى تصريحات صحفية، إن القصة بدأت لما سمع صوت اصطدام شديد جدا، وده في تمام الساعة 11 بليل بعد رجوعه من شغله، واول لما سمع الصوت دا فورا خرج بسرعه عشان يطمن في ايه، واول لما خروج شاف عربية مصطدمة بشجرة كبيرة وضخمة، وفي وقت ما العربية مشتعلة والدخان طالع منها، البطل علاء لم يلاحظ خروج أي حد من العربية، لا اللى المفروض أنه كان سايق ولا اي حد.
وده اللي دفع علاء عشان ينقذ الي موجود في العربية وقال نصا: “ربنا ألهمني أروح وأشوف مين فيها لأنه أكيد أغمى عليه، وبفضل الله ساعدني في فتح العربية إن الباب مكنش مقفول، لقيت فتاة أنقذتها ونقلتها بعيدًا عن السيارة”.
وبعد ما البطل المصري علاء اللي أنقذ الفتاة الإيطالية واللي عنده من العمر 38 سنة انقذ الفتاة رجع تاني لمكان الحادث عشان يتأكد لو في أطفال أو حيوانات أو أي روح في العموم لكن ملقاش أي حد تاني في العربيه وفورا اتصل على الإسعاف والمطافئ.
وبعدها سمعت الشرطة لأقواله وحصلت على كل البيانات الخاصه بيه. اللافت بقى ان علاء طول فتره كلامه على الواقعة كان باين أنه كله فخر وفرحه وقال: “الحمدلله تاني يوم طلعوني في الجرنال”.. الصراحه مش هو لوحده اللي مبسوط وفخور كلنا فخورين بيه وعلى شجاعته.
وحكي علاء أكتر عن تفاصيل وبيانات شخصية وقال ان هو متزوج وعنده بنت وولد ويقيم بإيطاليا مع أسرته من حوالى 15سنة، وصرح وقال إن أهل الفتاة عملوله زيارة في بيته وطلبوا منه أنه يقبل التعويض المادي مقابل اللي قدمه من شهامة وشجاعة لإنقاذ ابنتهم، ولكن هو رفض التعويض دا وقال: “دي زي أختي ومينفعش اخد مقابل لأنه فعل إنساني وده طبعنا كمصريين، نرمي نفسنا في أي حاجه ومش بنخاف من النهايه” الله عليك فعلا تشرف بجد.
وتلقى علاء سليمان، الكثير من كلمات الشكر والعرفان عشان العمل البطولي دا وأنه كان من الممكن أنه يتعرض للخطر او انه يتجاهل من الأساس الحادثه بس هو اختار انه يعمل اللي عليه يجازف بحياته عشان ينقذ روح ربنا خلقها.
وده اللى خلى الكل في إيطاليا يقول عليه “سوبر مان”.
وفى النهاية قال: أنا بتشرف إني مصري وعملت كدة، وأكتر لقب مفرحني أنهم بيقولولي يا مصري، وأنا مبسوط أوي بحاجة زي كدة والحمد لله مبسوط بحب الناس ليا وإن الناس كرموني بأطيب الكلمات.
تفتكروا علاء يستحق اللقب اللى حصل علي بإيطاليا، وانهم يقولوا عليه “سوبر مان” ولا لأ ؟
