بجنيه واحد ستصبح مليونير، و لو حظك قليل النصف جنيه ستبدله بآلافات الجنيهات يعني كسبان كسبان.المهم انك تضع يدك على الكنز الذي ستجده في منزلك باحتمال كبير .فما الحكاية؟
ياسلام لو جدك كان بيحب يجمع العملات أو حتى ركنلك كام ورقة من أيامه على جنب. يبقى عمل فيك جميلة العمر، لأن العملات القديمة دلوقتي بقت كنز وليها سوق مخصوص، الزباين فيه أصحاب مزاج وعندهم استعداد يدفعوا كتير عشان الفلوس القديمة.
يعني عندك مثلا الجنيه أبوجملين.. ده صاحب المركز الأول بلا منازع، سعره بيبدأ من 100 ألف لغاية مليون جنيه مصري بالتمان والكمال.
وعندك كمان ريال السلطان، وده سعره بيبدأ من 100 ألف إلى 500 ألف جنيه مصري بس بشرط: يكون مكتوب على صورة العملة اسم «السلطان فؤاد»، وفي جهة الكتابة متسجل تاريخ 1920.
وفي كمان ال 100 جنيه اللي مرسوم عليها “القلعة”: العملة دي الطلب عليها كبير وتمنها 45 ألف جنيه.أما عملة الـ«الشلن» اللي اطبعت في آخر عهد الملك فاروق، فتعتبر من العملات النادرة لأنها اطبعت بكميات قليلة جدا وده اللي خلى سعرها يضرب في السما، انت متخيل ان سعرها 30 ألف جنيه!
طبعا رقم كبير، بس لو فاكر ان المفاجأت انتهت لغاية هنا تبقى غلطان، لأن لسة في عملات تانية مكسبها كبير زي ال5 مليم المعدن إلى نصف تمنها دلوقتي لغاية 20 ألف جنيه، بس بشوية شروط: يعني لازم تكون إصدار سنة 1973 وعليها صورة صقر.
وضيف في القايمة عندك، الخمسين القرش الورق برسمة أبو الهول ب20 ألف جنيه برضه، ده غير مجموعة عملات تانبك زي الجنبه المعبد ب 14 ألف جنيه، والـ10 جنيهات البصلي ب 200 جنيه، والـ10جنيه المدنى الحمراء بـ100 جنيه.
وطبعا كل ورقة سعرها بيختلف عن التانية، والفرق هنا سببه جودتها وتاريخ الإصدار، يعني كل ما كانت العملة قديمة كل ماكان سعرها أعلى، عشان كده تلاقي عملات العهد الملكي أغلى من أي عملات تانية.
ولو عاوز تتفرج بتقسم وتعاين روح أماكن بيع العملات القديمة ودي كتيرة اوي في مصر واشهرها في القاهرة زي محلات منطقة وسط البلد، ومحلات بمنطقة خان الخليلي في شارعي عماد الدين والألفي.
وعندك برضه أماكن مشهورة في اسكندرية زي شارع خالد بن الوليد في منطقة ميامي، ومنطقة الساعة السيوف، والإبراهيمية، ومحطة الرمل، ومحطة مصر، والمنشية، والعطارين، وسوق الجمعة غرب الأسكندرية، واخيرا منطقة بحري على كورنيش الأسكندرية والشوارع المجاورة ليها.
وطبعا متنساش النت، لأن عليه صفحات وجروبات متخصصة في بيع وشراء العملات القديمة، ادخل عليها واتفرج، بس الاول قولنا هل سبق ووقعت على ورقة من دول؟ طيب ممكن تفكر تشيل مبلغ من عملات دلوقتي يمكن يبقوا كنز لأحفادك بعدين؟
