قصة مؤلمة لرحيل نجل البلوجر ديانا محمد

بعد ما كان الحاجة الحلوة فى حياتها ،وسبب قوتها في مواجهة الحياة ، في لحظة انفط قلبها عليه، وبعد ما كان لديها أمل يعود للدنيا بضحكته الحلوة فارق الحياة، كيف رحل نجل البلوجر ديانا محمد ؟

لحظات صعبة مرت بها البلوجر ديانا محمد الساعات اللى فاتت بعد رحيل إبنها الصغير ..ديانا عاشت كام يوم من أصعب الأيام اللى ممكن أى أم لا قدر الله تمر بها..حصل لإبنها إيه؟وإزاى حالته ساءت للدرجة دى وبقى بين الحياة والموت؟ ربنا يصبرها على فراق ضناها..

إدعوا لركان ربنا يخليكوا كلكوا إدعوله ساعة الفطار ..دى كانت كلمات البلوجر ديانا محمد اللى أثرت فى كل متابعيها وكل جمهور السوشيال ميديا ..وخلال ساعات من الفيديو اللى نشرته بقيت هى وإبنها حديث السوشيال ميديا ..

ديانا نشرت فيديو على حسابها إنستجرام بتقول فيه إدعوا لإبنى راكان عمل حادثة ودخل العناية المركزة بين الحياة والموت ..ارجوكوا إدعوله حالته خطر وقلبه وقف ورجع إشتغل تانى ..
طول الفيديو ديانا منهارة وقالت إنها حاسة إن قلبها هيقف من الحزن اللى هى فيه..
لكن متكلمتش عن اللى حصله بالظبط،ولا أى تفاصيل عن الحادثة ،ولا إزاى العربية خبطته!
مفيش أصعب من إن الأم تشوف إبنها بيتألم وتقف متكتفة مش فى إيديها حاجة إلا الدعاء..الدعاءوبس

ومن هنا ديانا لاقيت دعم كبير من كل زمايلها ،والمتابعين ،وكله على أمل يرجع لحضن أمه تانى ..لكن للأسف راكان مرجعش لأمه..راكان فارق الحياة بعد أيام صعبة عاشها بعد الحادثة .

ديانا كانت بتشارك وتطمن الجمهور أول بأول عن حالة راكان ..لحد ما نشرت إستورى على حسابها بصورة إبنها وكتبت إن لله وإن إليه راجعون ..واللى يقطع القلب أكتر أخر فيديو نشرته لركان كان فى عيد ميلاده كمل سنتين وعلقت : كل سنة وإنت قلبى يا ركونة ،بحبك..

كل الناس أجمعت إن اللى حصله ده حسد،بسبب إن عيشة البلوجرز كلها على الملأ،ومعندهمش خصوصيات ،اكيد إتاخد عين خلت ده مصيره ..لكن الحق يتقال هى مش من البلوجرز الكتير اللى بتظهر ولادها عمال على بطال بالعكس صور راكان قليلة جدا معاها وفى المناسبات بس أعياد ميلاده هو وأخواته ..هى العين حق فعلا ..ولكن نصيبه كده إدعوله بالرحمة ،وإدعوا لديانا ربنا بصير قلبها على فراقه..

ديانا قدرت تدخل لقلوب البنات من الفيديوهات اللى بتقدمها،والمحتوى الخاص بهم..من ميكاب وملابس وأهم الممنتجات اللى هيحتاجوها ..ده غير إنها ميكاب أرتيست وعايشة فى الإمارات وأم ل 3 أطفال ..كيان وشام وركان

ديانا خريجة كليه الهندسة قسم كهربا..ولكن قررت تسيب مجال الهندسة وتركز فى الفاشون والسوشيال ميديا وكل اللى يخص الايف ستايل والأزياء ..وبتقدم دايما النصايح للبنات فى كل حاجة تهمهم

تفتكروا فعلا اللى حصل لركان كان حسد فعلا؟ وهل مع ولا ضد إن البلوجرز ينشروا صور ولادهم على السوشيال ميديا ويشهروهم من صغرهم ؟شاركونا فى التعليقات..