معروف إن جواز السفر يعتبر وثيقة رسمية تصدرها الدول لرعاياها وبجواز السفر تقدر تسافر لبلاد كثيرة، لكن ليس كل جواز مثل الأخر وده لأن في جوازات سفر تكلفتها عاليه جدا وتصل لـ أرقام خيالية.
طيب يا ترى ايه أغلى جواز سفر في العالم؟ وتكلفة اصداره كام؟ وهل أغلى جواز سفر هو الأقوى؟ تخيل إن في دول لو كنت من مواطنيها هتضطر تدفع أكتر من 200 دولار أمريكي عشان تطلع جواز سفر
وده لأن جوازات السفر بتختلف من دولة للتانية يعني في دول بيعدي رسوم تكلفة جواز السفر فيها أكتر من 200 دولار ودول تانيه بتقل فيها عن 50 دولار.ولأن ببساطة بيكون متوسط تكلفة الحصول على جواز سفر في العالم 75 دولار وبياخد حوالي متوسط 46 ساعة .
وحسب أحدث بيانات نشرها موقع أرقام السعودي، فـ تصدرت استراليا في 2023 أغلى جوازات السفر في العالم من حيث تكلفة الإصدار
وده لأنه بيكلف جواز سفرها لمواطنيها 230 دولار يعني حوالي 7 آلاف جنيه مصري. أما بقى المكسيك فوصل رسوم إصدار جواز السفر فيا للموانين لـ 170 دولار، ودول بالمصري حوالي 5244 جنيه،
وفي المرتبة التالته كانت سويسرا وده لأن تكلفة إصدار جواز السفر فيها 140 دولار أمريكيٍولو عايز تعرف بكام بالمصري فهتكون في حدود 4319 جنيه.
أما بقى المرتبة الرابعة كانت من نصيب إيطاليا واللي تكلفة إصدار جواز السفر لمواطنيها 135 دولار، ودول بقى بالمصري حوالي 4164 جنيه.
الله! أمال امريكا فين؟ منا جايلك فـ الكلام اهو امريكا ياسيدي احتفظت بالمرتبة الخامسة وده لان تكلفة إصدار جواز السفر فيها وصل لـ 130 دولار، ودول بالمصري حوالي 4010 جنيه.
ونيوزيلاندا جت في المرتبة السادسة وده لان تكلفة جواز السفر فيها وصلت لـ 128 دولار، وبحسبة بسيطة بالمصري هتوصل التكلفة دي لـ 3948 جنيه.
أما بقى تشيلي فكان من نصيبها المرتبة السابعة وكان تكلفة إصدار جواز السفر هناك 127 دولار، يعني بالمصري حوالي 3917 جنيه
وكندا احتفظت بالمرتبة التامنة وتكلفة جواز السفر فيها كام 125 دولار، ودول حوالي 3856 جنيه بالمصري.واليابان اتمسكت بالمرتبة التاسعة بتكلفة وصلت 115 دولار وده في حدود 3.547 جنيه بالمصري.
ورقم 10 كان من نصيب تركيا واللي بيتكلف إصدار الباسبور فيها 110 دولار، يعني حوالي 3.393 جنيه، بس لو فاكر ان الرقم بيعبر عن قوة الباسبور تبقى غلطان، لأن أقوي جوازات السفر في العالم ليها ترتيب تاني خالص.
وحسب تقرير نشره موقع CNN الأمريكي، اليابان بتيجي في المركز الأول لانها بتوفر للمواطنين الوصول من دون تأشيرة إلى 193 وجهة في جميع أنحاء العالم. وفي المركز التاني موجود سنغافورة وكوريا الجنوبية بإمكانية الوصول إلى 192 وجهة.
وبعدين ألمانيا وإسبانيا في المركز التالت مع إمكانية الوصول إلى 190 دولة، وفي المركز الرابع فنلندا، وإيطاليا، ولوكسمبورغ بمجموع 189 وجهة.
وبعدهم في المركز الخامس، النمسا، والدنمارك، وهولندا، والسويد بمجموع 188 وجهة.وطبعا انت بتسأل دلوقتي مصر فين من ده كله؟
بص ياسيدي، رسوم استخراج جواز سفر لأول مرة هي 500 جنيه، لكن لو الشخص اللي هيطلع الباسبور مش معاه مؤهل دراسي، يبقى ساعتها لازم دفع ضمان اجتماعي بقسم 400 جنيه.
وحسب مؤشر هينلي وشركاه: ترتيب مصر من حيث جواز السفر هو رقم 94 من بين 112 دولة موجودين في تصنيف 2022، وفي نفس المركز موجود معانا الأردن وغينيا الاستوائية.
