أعلنت الإعلامية بسمة وهبة أنها ستقاضي شركة شحن عالمية، بسبب تأخرهم في إرسال أشعة نجلها إلى ألمانيا كي يفحصها الطبيب، الأمر الذي تسبب في سوء حالته.
وقالت بسمة وهبة في فيديو نشرته عبر حسابها بموقع إنستجرام: الرسالة دي لـ شركة الشحن، مش هسيبكم، لأنكم تسببتم في سوء الحالة الصحية لابني.
وتابعت : أنا جيت من السعودية يوم 26، وابني كان تعبان وخد كذا حقنة في العمود الفقري ما ريحتهوش، وبعتنا لدكتور في ألمانيا قال لازم عملية، ولكنه طلب مننا أشعة MRI، وبالفعل تمت وقولت له في مصر أسرع من السعودية لأن المسافة بين السعودية وألمانيا أطول وقولتله هبعتها ليك في مكتب في المطار وقالوا هتوصل في 48 ساعة.
واضافت :” قعدت عندهم أيام 26 و27 و28 و29 صحيوا من النوم وبعتوا السي دي للندن، واكتشفوا أنها جات غلط وبعتوا لألمانيا، والمفروض تروح فرانكفورت بعتوها لبلد تانية في ألمانيا وابني آلامه بتزيد والمفروض يعمل العملية.
وأكملت: ابني عريس وفرحه بعد أسبوعين، وربنا ميجبش لينا إلا الخير لكن أنتم تسببتم في شر، وإحنا أجلنا الفرح علشان العملية تتعمل بسرعة ويتخلص من آلامه، ولو كنت بعت حد وركبته طيارة كان تقريبًا هيكون نفس السعر لأنكم أسعاركم غالية، ومش هسيبكم وهقاضيكم مش في مصر بس وبرة مصر كمان.
