“مفيش حد بينشر غسيل في بلكونات ولا فيه دوشة عربيات”.. هذا ما قاله قاله شاب مصري في السعودية شايف ان البلد هناك رايقة جدا وعندهم نظام حلو جدا عن مصر.
ايه الحاجات التانية اللى شافها الشاب مميزة فيها السعودية؟ .. وأيه رد السعوديين عليه؟ .. كل ده وأكتر هنعرفه مع بعض في الفيديو ده.
أسرار كتيرة كشفها شاب مصري عايش في السعودية عن الشعب السعودي واطباعهم اللى معجب بيها ومبسوط بيها، وتمنى لو أنها في مصر أو مصر تحاول تعمل زيهم.
أولها اللي كان عن الشعب السعودى وأنهم هناك عمرهم ما نشروا غسيل الهدوم في البلكونات، وده عكس طبعا اللى بتعمله ستات البيوت هنا في مصر، وخاصة الأحياء الشعبية وفى المحافظات الريفية وفى الصعيد بيبقى عادى جدا انك تلاقى حد ناشر هدوم مغسولة في بلكونة البيت، وكل بيت في الريف والصعيد ضرورى تلاقى فيه بلكونه، وبدل الواحدة تلاقى اتنين وتلاتة.
غير موضوع الغسيل والبلكونات ده أتكلم الشاب المصرى أنه شاف هناك حاجة غريبة قوى في السعودية، هو شافها غريبة شوية وهو أنهم هناك مافيش مرة سمع سائق عربية بيزمر بالعربية اللى معاه، على الرغم من أن هناك العربيات كتير والطرق كتيرة ومشاويرهم أصلا كتيرة.
الشاب المصرى المغترب حاليا في السعودية شايف أن موضوع العربيات ده مشكلة شوية في مصر، شايف أن السعوديين مميزين في كده وأنه ولا مرة شاف حد بيزمر بالعربية اللى معاه، وزاد في كلامه وقال إن هناك ممنوع حد يشغل زمارة العربية نهائها، والحقيقة مش معروف بالظبط فيه كده ولا لا.
بس فيه سعوديين في التعليقات على الفيديو بتاعه قالوا إن مسموح عادى أن حد يستخدم زمارة العربية، بس الفكرة أنهم هناك الطرق عندهم كويسة شوية ومسهلة الأمور معاهم، وكمان بيحترموا قواعد المرور فالعملية سهلة معاهم على الطريق والدنيا بتمشى وعال العال.
نقطة تانية بقى مهمة أتكلم فيها الشاب المصرى أن البيوت هناك في السعودية واطية شوية عن مصر، مفيش جو البيوت العالية والعمارات زى اللى عندنا هنا، والنقطة دى بردوا وضحها ليها الشباب السعودى في التعليقات عليه وقالوا أن عادى خالص فيه بيوت واطيه وفيه بيوت عالية، بس في الأغلب مافيش داعى للبيوت العالية، كل واحد بيعمل اللى يكفيه وخلاص.
أهم نقطة بقى ردوا بيها الشباب السعودى على كلام الشاب المصرى، هي الجزئية الخاصة بموضوع نشر الغسيل في البلكونات، الجمهور السعودى وضح للشاب المصرى أنهم وفى أغلب البيوت هناك بيستخدموا حاجة أسمها منشف ملابس، ودى بتطلع الملابس ناشفة على اللبس على طول ومفيش داعى لنشر الغسيل ولا حاجة من دى.
أنتم رأيكم إيه في الاختلافات اللى قالها الشاب المصرى عن السعودية ومصر؟ وهل الحياة في السعودية أحلى من مصر ولا لاء؟.. شاركونا برأيكم في التعليقات.
