كثير منا بيسمع عن قصص بعض المتسولين وساعات نتفاجي أن ورائهم مبالغ كبيرة من التسول،لكن هو ممكن يقدر أي شخص يجمع ملايين من التسول؟
ده اللي حصل فعلا لما لاقوا مع واحدة من المتسولين مبلغ ضخم بعد وفاتها، لكن السؤال هنا: إيه حكاية المتسولة دي؟ ولاقوا معاها كام؟ وإيه هي عقوبة التسول؟
ظاهرة التسول في مصر منتشرة بشكل كبير جدا وبقت تاخد أشكال كتير أوي لدرجة أن في بعض المتسولين ممكن يخدعوك بمظهرهم عشان يقدروا يكسبوا من وراك لكن الحقيقة أنهم ممكن يكونوا أغنى منك بمراحل
وده اللي حصل في قنا لما الأهالي لقوا مبلغ ضخم جدًا في مكان كانت ساكنه فيه واحدة من المتسولات اللي دايما كانت بتلف في شوارع قنا عشان تتسول
وده خلاهم في حالة ذهول ، بس الحكاية بدأت إزاي؟
بحسب موقع القاهرة 24، الست المتسولة كانت عايشة حياة معدمة أو بمعنى أصح كانت بتتظاهر بكده
الست دي اسمها خيرية عبد الجليل ومشهورة بغوايش من مواليد مركز دشنا بمحافظة قنا بس كانت عايشة في مركز الوقف خلال السنين اللي فاتت، وسابت الدنيا من أيام وتكفل أهالي القرية بمصاريف دفنتها وده قبل ما يلاقوا الثروة الكبيرة بتاعتها اللي لاقوها الأهالي في الحوش اللي كانت عايشة فيه
طيب يا ترا لاقوا معاها كام؟
بص يا سيدي الست دي كانت شايلة مليون جنيه عبارة عن فلوس فكة كانت مخبياهم قبل ما تموت في أكياس بلاستيك
وبعد وفاتها قسموا الثروة دي على أخواتها الخمسة تحت إشراف لجنة من الأهالي، وده حسب شهود عيان لموقع القاهرة 24.
وعلى فكرة الست دي مش أول متسولة يكون معاها مبالغ ضخمة كده وده لأن من أيام الحكومة قدرت أنها تقبض على واحد من المتسولين اللي لاقوا معاه مبالغ كبيرة
بس يا ترا إيه حكاية المتسول ده؟
بحسب موقع صدى البلد، المتسول ده كان معاه مبلغ كبير قدر أنه يجمعه من التسول لدرجة أنه كان كل أسبوع بيودع مبلغ في حسابه في البريد.
ومش بس كده ده بعد القبض عليه لاقوا معاه فيزا كارت و 18 قرص من الممنوعات، ده كمان لاقوا في بيته عملات أجنبية بجانب المبالغ المالية اللي كانت معاه.
ده كمان أعترف أن الفلوس اللي جمعها كانت من نشاطه في التسول وبالفعل تم إتخاذ الإجراءات القانونية معاه
لكن يا ترا عقوبة التسول في مصر؟
بحسب تصريحات أستاذ القانون الدستوري لليوم السابع، يعاقب بالحبس لمدة شهرين أي شخص عمره 15 سنة أو أكتر بيمارس التسول في الطرق أو المحلات العامة، أما لو كان الشخص اللي بيمارس التسول غير صحيح البنية فيعاقب لمدة شهر واحد.
ده كمان أي شخص يدخل بيت أو محل بغرض التسول يعاقب لمدة 3شهور، ويعاقب بنفس العقوبة برضو لو معاه 2 جنيه بس ومقدرش يثبت مصدرهم.
أما اللي بيستخدم الأشخاص تحت السن بغرض التسول فبيتعاقب لمدة 3 شهور سجن لكن لو الشخص ده كان والي أو وصي اللي بيتسول فالعقوبة بتكون من 3 لـ 6 شهور، أما لو المتسول بعد قضاء العقوبة رجع يمارس التسول تاني هنا بقى بيتحبس لمدة سنة.
ودلوقتي قولنا إيه أغرب قصة سمعتها عن المتسولين؟
