ياترى ما يحدث لأسعار الذهب هذه الفترة؟ وما سبب انخفاض الأسعار عالميًا وما تأثير الانخفاض هذا على السوق المحلي للذهب وياترى ما هو مصير الأسعار الفترة القادمةوهل هذا وقت مناسب للشراء أم للبيع؟
الدهب عالميا محقق تراجعات كبيرة بس ياترى هو إيه اللي بيحصل وليه الأسعار بقالها فترة في النازل؟ هقولك ياسيدي اللي حصل إنه يوم الخميس اللي فات صدر تقرير مهم في امريكا عن الوظايف اللي بيوفرها القطاع الخاص غير الزراعي
والتوقعات كانت بتقول إن القطاع هيضيف 266 ألف وظيفة في شهر يونيو اللي فات، لكن التقرير صدر وفاجىء الكل وظهر فيه إن الشركات ضاعفت عدد الوظايف المتوقع في شهر يونيو وضافت نص مليون وظيفة!
ودي كانت أكبر زيادة حصلت خلال سنة كاملة، طيب إيه علاقة اللي بيحصل ده بأسعار الدهب ؟
هقولك يا سيدي دلوقتي احنا عندنا منافسين فـ الاقتصاد الامريكي مهمين جدا وهما الفايدة وسعر الدولار والدهب
فلما يطلع خبر إن الاقتصاد الأمريكي وفر وظايف بضعف التوقعات ده معناه إن سوق العمل في امريكا قوي جدا، ومعناه برضه ان في فرصة أكبر لزيادة معدلات التضخم اللي بيحاول الفيدرالي الأمريكي يقلله من السنة اللي فاتت عن طريق رفع الفايدة على الدولار الأمريكي بمعدلات كبيرة لأول مرة من سنين.
والطبيعي إنه مع رفع سعر الفايدة سوق العمل يتأثر وقروض الشركات تتأثر وطبعا الشركات هنا بتقلل حجم انتاجها وبتقل فرص الوظايف لكن ده محصلش، وده طبعا عكس اللي الفيدرالي بيفكر فيه.
وده معناه إنه في اجتماعه الجاي ناوي يرفع سعر الفايدة تاني وكمان بنسبة أعلى من المتوقع عشان يحافظ على قوة سعر الدولار ويجذب المستثمرين ليه
وبكده يبقى الفيدرالي الأمريكي هيستمر في سياسة رفع الفايدة، واللي أكيد هتأثر بشكل سلبي على المستثمرين وعلى أسعار السلع زي الدهب طبعا .
طيب ايه علاقة التقارير اللي زي دي بأسعار الدهب عالميا؟
اللي لازم تفهمه إنه طبيعي جدا يحصل تغيير في أسعار الدهب مع كل بيان رسمي بيصدر مع كل قرار أو بيان خاص بالاقتصاد الأمريكي
عندك مثلا بسبب التقرير اللي صدر للوظائف يوم الخميس اللي فات سعر الدهب عالميا وصل لـ1905 دولار للأونصة ويوم الجمعة وصل لـ 1917 دولار للأونصة.
مش بس كده ده كمان معظم البورصات العالمية سجلت تراجع حاد يوم الخميس .أما لو بتسأل عن اخر توقعات البنوك العالمية لأسعار الدهب ، فـ بنك أوف أمريكا عدل من توقعاته المستقبلية لسعر الدهب للعام الحالي عند متوسط 1923 دولار للأونصة بعد ما كانت التوقعات 2009 دولار للأونصة
والتغيير ده طبعا كان بعد إعلان الفيدرالي رفع الفايدة مرتين خلال النص التاني من عام 2023.نيجى بقى للسؤال الأهم دي مناسبة للشرا ولا البيع ؟
شعبة الدهب قالت في تصريحات لجريدة المصري اليوم إن متوسط سعر الذهب الحالي مناسب جدًا للشراء وإنها كمان مش بتتوقع ارتفاعات مفاجئة في أسعار الدهب وده لحد نهاية الأسبوع الحالي
خاصة وإن حركة العرض والطلب متوازنة وكمان في استقرار في سعر الصرف، والسعر العالمي بيشهد نفس حركة السعر المحلي من حيث الارتفاع والانخفاض الهادي
دلوقتي قولنا رأيك في أسعار الدهب الفترة الحالية؟
