افرحوا يامصريين الخير قادم، والجنيه سيعيش أحلى أيامه وهذا ليس كلامنا ، إنه حديث مؤسسات مالية دولية قالت في تقرير لها عن مستقبل أسعار الصرف ومتى سيتسقر الجنيه؟
كنا بنسمع الأيام اللي فاتت كلام محبط كتير عن مستقبل الجنيه والأسعار الفترة الجاية، لكن أخيرا هنسمع أخبار حلوة بتأكد إن 2023 سنة الخير على الجنيه.
وده اللي أكدته المؤسسات المالية الدولية قالته وأكدت إن مصر لو حررت أسعار الصرف الفترة الجاية الجنيه هيشهد استقرار ملحوظ.
ومن ضمن المؤسسات دي بنك جولدمان ساكس وده عبارة عن مؤسسة مالية دولية واتكلم عن الأوضاع في مصر وقال إن الخيارات اللي قدام الحكومة قليلة ولازم تسرع في تنفيذ أجندة الإصلاح الاقتصادي.
وطبعا الأجندة دي اتفقت فيها الحكومة المصرية مع صندوق النقد الدولي مقابل حصول مصر على قرض بـ 3 مليار دولار على 3 سنين و10 شهور .
والقرض ده اخدته مصر بشرط تحرير سعر صرف الجنيه مقابل الدولار وكمان تنفيذ برنامج الطروحات اللي أعلنت عنه الحكومة مؤخرًا وقالت إنها هتطرح 32 شركة حكومية في البورصة .
والطرح ده هدفه تخارج الحكومة بشكل تدريجي من القطاع العام وإنها تدي فرصة للقطاع الخاص والمستثمرين إنهم يدخلوا يستثمروا في الشركات دي .
والبنك كان شايف إن مصر لو منفذتش الشروط دي هتواجه نتائج صعبة، لكن في حالة لو نفذت مرونة سعر الصرف ويقصد هنا تعويم الجنيه هتكون نتيجة ده إيجابية جدا على مؤشرات الاقتصاد.
طيب تفتكروا مصر يعني لو معومتش الجنيه هيجرى إيه ؟
هقولك ياسيدي التقرير اللي أعلن عنه بنك جولد مان ساكس قال إنه في حالة لو مصر بطلت تعتمد سعر صرف مرن واتحكمت في سعر الجنيه مقابل الدولار ده هيصعب الوضع الاقتصادي اكتر الفةر الجاية .
زي مثلا إنه هيأثر على الاستثمار الأجنبي المباشر وعشان كده متوقع إن يسجل 9 مليار دولار في السنة خلال الـ3 سنين الجايين بدل ما كان المفروض يسجل 14 مليار دولار وطبعا ده فرق كبير .
كمان البنك كان شايف إن مصر لو معومتش الجنيه بشكل حر ده هيخلي التمويلات اللي بتتقدم لمصر من الأسواق الدولية تقل وتكون محدودة جداً وتوقع إنها تكون في حدود 3 ملياردولار في الـ 3 سنين الجايين وده نص توقعاتهم المتفائلة لو الجنيه اتعوم.
مش بس كده ده الأسوأ في السيناريو ده إنهم متوقعين إنه الاحتياطات النقد الأجنبي لمصر هتنخفض بشكل كبير لو الحكومة ملتزمتش بمرونة سعر الصرف وهتكون أقل من 13 مليار بعد 3 سنين بس.
لكن مش عايزاكم تحبطوا لأن في سيناريو تاني متفائل جدا للاقتصاد المصري وده متوقع يحصل في حالة لو مصر التزمت بمرونة سعر الصرف، والتقرير شايف إنه لو ده حصل هيدعم معدلات التصدير بشكل كبير والقدرة التنافسية على المدى الطويل
كمان ده هيساعد مصر على التكيف في وقت قصير وهيعزز التبادل التجاري ويزود تدفقات الاستثمار وده نتيجة زيادة مبيعات الأصول بمتوسط 14 مليار دولار سنويا على مدى السنوات الـ3 الجايين.
والتقرير شايف إن تحرير سعر الصرف هيساعد مصر إنها تحصل على تمويلات خارجية بمتوسط 6 مليار دولار سنويا وده لحد سنة 2026.
كمان ده هيسمح بتراجع عجز الحساب الجاري بشكل تدريجي لـ حوالي 2.6% بدل 3.5 بعد 3 سنين بس.
انتوا دلوقتي قولولنا رأيكم هل انتوا كمان شايفين إن التعويم هيحل كل مشاكل مصر الاقتصادية ولا لأ؟
